Текст книги "Аскетика. Том I"

Вопрос 725. Аще убо сумнятся, кто первее благословит, кийждо попущая друг другу, что подобает творити?

Ответ. Иже сих возбудивый к тому, должен есть просити, егоже хощет благословляюща, благословити. Егда же никтоже приимет то да не будет любопрение, должен сам восприяти и рещи: молитвами святых отец, Господь да сотворит с нами (милость). Аминь.

Вопрос 726. Понеже рекосте, яко добро есть и миряном поминати Бога в пище, да памятию Того освятится пища она: убо добро ли есть, не у положену бывшу хлебу на трапезе, предреченный стих глаголати и молитву?

Ответ. Можно убо сия рещи; но понеже в молитве глаголет кто: благослови предлежащая, добро есть и последовательно предлежащим хлебом глаголати молитву.

Вопрос 727. Аще глаголют ми отцы суд сотворити в некоем деле, и не зело надеюся на себе, что должен есмь сотворити? Отрещися ли, или прияти? И еже мнится ми рещи, или вопросити ведущих лучше, и тако судити?

Ответ. Повеления ради отец, приими, и рцы судящимся, яко по видимой мне правде имам судити. И блюди, еже прав имети помысл твой;

и да не уклониши сердца твоего к некоему по страсти, ниже по благоприятству; и правду, яже видится тебе, рцы. Произволение бо судит Бог, Иже Сам точно истину ведый. Аще ли же и возможеши вопросити ведущаго известнейше тебе, то не безместно есть.

Вопрос 728. Аще дело тое требует клятвы, уставити ли им, или ни?

Ответ. Никогдаже да установиши клятве от кого данней быти: Бог бо запрети клятися кому; но глаголи, яко дело сие клятвы требует. Аще убо хощете клястися, в вас есть. Аще ли же повелен будеши от большая власти судити, то понуди уставити клятву: сиречь полезная прежде известно испытав, и тогда установи, ничтоже сумняся.

Вопрос 729. Аще сежу близ человека старца, или велика лица чтуща, и погрешает в ударении, или речении, и вем аз тое правее: реку ли ему? или ни?

Ответ. Аще веси, яко с радостию послушает, то рцы: аще ли же ни, ничтоже да речеши ему. Внемли себе, да не возтщеславишися в помысле твоем. Полезно бо тебе молчати паче, нежели с тщеславием рещи что.

Вопрос 730. Ин христолюбец вопроси тогожде старца: аще инок просит мя пособити ему в некоей вещи, и не мнится мне быти по Богу: что сотворю?

Ответ. Аще несть по Богу, да не пособиши; но отступи от вещи тоя, глаголя ему самую истину: зане, якоже мнится мне, не просиши от мене праведная. Аще ли же есть по Богу, и не приносит ти яковаго вреда душевнаго, пособи ему по силе: будет бо мзда. Аще ли же будет тебе вред, да не влагаеши себе в вещь тую: не истязует бо тебе Бог сотворити вредящее душу твою.

Вопрос 731. Егда вижду кого досаждающа иноку, или обидяща его, смущаюся нань: убо добре ли творю, или ни?

Ответ. Ничтоже со смущением бываемое есть добро, но от действа диаволя с самооправданием. Аще убо смущаешися, ничтоже да речеши, понеже и онаго множае смутиши: злоба бо злобы не убивает. Аще ли же не смущаешися, рцы ему с кротостию: не боишися ли греха, без правды досаждая авве? Не веси ли, яко образ, егоже носит, Божий есть? И (яко) прогневается Бог? И тако глаголя, обретаешися по Богу глаголяй. Силен же есть Бог, якоже хощет, онаго укротити.

Вопрос 732. Ин христолюбец, вопроси тогожде старца: суд имам с некиим о вещи: како повелеваеши, да сотворю: прилежно ли стяжуся с ним, или вознерадею о прилежании (таковом), и скорее отступлюся?

Ответ. Потщися, елико можеши, скорее отступитися. Совершенных бо есть мужей еже не быти смущенным от находящих искушений. Немощный же, аще отложит избавитися, приходит по сих и кается. И должен сый себе виновна творити, обращается в хуление на Бога и погубляет душу свою. И исполняется на нем: кая польза человеку, аще весь мир приобрящет, душу же свою отщетит?

Вопрос 733. Понеже должен ми есть некто, и аще не вознерадею мало, не приидем в примирение, что повелеваеши, да сотворю?

Ответ. Ищай мира не лишается мира Божия. Верен убо вмале, и во мнозе верен есть, и хвалится милость на суде. Темже убо, аще человек не вознерадит о потребе мирстей, не достизает мира Христова. Начный же в вас дело благо, той и совершит е, даже до дне Господа нашего Иисуса Христа. Молитва бо наша, сия есть: да даст нам Бог мир, да совершим дело Божие; якоже свидетельствовано есть от святейшаго странноприимца всея церкве.

Вопрос 734. Еда должен есмь коего-либо инока странна, приходяща ко мне, приимати, не испытуя, яже о нем? Аще же поспешу прияти его, когда подобает его отпустити? И подобает ли что подавати тому исходящу? Суть бо нецыи и сего требующе.

Ответ. Писано есть в Приточнице: не всякаго человека вводи в дом твой. Егда убо приходит странный к тебе, помолися прежде Богу, и тако испытай, яже о нем, и откуду есть, и камо идет. И аще видится тебе, яко должен еси его прияти, то приими и отпусти по пищи, ничтоже подавая ему. Аще бо восхощеши выше меры твоея употребити странноприимство, то не пребудет с тобою.

Вопрос 735. Что убо, яко имех к нему извещение, и удержах его мало дней, и хощу негде отыти, и стыждуся рещи ему отыти, да не соблазнится, или без вины хощу его отпустити: что сотворю?

Ответ. Рцы ему с тихостию: авво, произволяеши ли ныне негде отыти? И аще речет, ей, ты рцы ему: и аз потребу имам, и хощу тоя ради отыти. Аще ли же и речет: яко ни, то рцы ему: и како повелеваеши? Яко аз потребу имам негде отыти, и несть зде могий тебе послужити. И тако и той отыдет с миром.

Вопрос 736. Добро ли есть скутовати вещи келейныя, да не что погубится, или оставити вещь на Бога?

Ответ. Добро есть скутовати сия, не точию потребныя странноприимству, но и яже суть для служения, по еже сотворити потребу. Не подобает бо дати вины диаволу. Аще ли же случится от забвения, или лености погибнути нечесому, да не скорбиши, но укори себе за леность свою, и проси от Бога прощения. И да не отвратит тя от сего добраго дела странноприимства, но пребуди по силе твоей, а не паче силы, с разсуждением сие творя, и попечение имея прочее, во еже не дати места искушению.

Вопрос 737. Понеже Господь рече: блажени плачущии, апостол же глаголет: светлу быти и благоприступну. Что творя кто мнится плакати, или светел быти? И како есть мощно обема вкупе быти, плачу и веселости?

Ответ. Плач есть, яже по Богу, печаль, юже рождает покаяние. Распознавания же покаяния суть: пост, псалмопение, молитва, поучение словес Божиих. Светлость же есть, яже по Богу тихость, яже и словом и лицем с честностию показуется сретающимся. Да имать убо сердце плач, лице же и слово честную светлость. И тако обоя могут вкупе быти.

Вопрос 738. Аще друг просит мя поручитися зань, поручуся ли, или ни?

Ответ. Порука искушение наносит; аще убо убегнути хощеши искушения, то да не влагаеши себе в поручение, но со дерзновением глаголи ему истину, глаголя: яко любовь, юже имам к тебе, веси; заповедь же имам отец ведущих мою немощь, не быти споручником кому. Паче же они провидеша мене. Еже убо преступити заповедь и согрешити Богови боюся. Сия рцы и, аще оскорбится, ты небрези. Виною же благословною аще можеши избавитися добро есть. Может бо случитися, яко он не произволит взяти тя споручником или за честь, или за ину кую-либо вещь, и не обрящется у тебе вина, и не приимет места скорбь. Аще же совосхитишися споручитися, да не вложиши себе во уныние излишнее; но рцы помыслу своему, еже бысть, бысть; но Господь да избавит тя, и да покрыет во яже по сих; и да не престанеши моляся о сем Богови; и Той силен есть сотворити по велицей милости Своей.

Вопрос 739. Любима имам, и беду приемлет во спасении души своея, или в погублении имений своих: велиши ли, да помогу ему?

Ответ. Аще будет любимец твой по Богу, и бедствует во спасении души своея, или в погублении имений своих, потщися помощи ему по силе твоей, во елико не обретаеши вреда душевнаго. Аще ли же предлежит вред душевный, то уклонися, и да не вложиши себе, оставль вещь Богови и моляся Ему о помощи ближняго; и Той силен есть полезное ему сотворити, якоже нам подобало бы.

Вопрос 740. Любима имам и обретеся еретик, увещаю ли его о правом мудровании?

Ответ. Увещай его правую познати веру; но да не стязаешися с ним, ниже да восхощеши познати, что мудрствует, да не ввержеши в себе яд его. Но аще восхощет всяко воспользоватися и услышати истину веры Божия: пойми его ко святым отцем, могущим о Христе его воспользовати; и тако обрящешися без вреда по Богу ему помогая. Аще ли же, по первом и втором увещании, не приимет исправления, таковаго, по апостолу, отрицайся. Не бо хощет и Бог творити кому паче силы его, якоже глаголют отцы. Аще бо видиши, глаголют, кого утопающа в реце, да не даси ему руки твоея, да не сповлечет тя, и умреши с ним, но даждь ему жезл свой, и, аще убо возможеши извлещи его, се добро; аще ли же ни, то оставиши ему жезл твой, а ты спасешися.

Вопрос 741. Некто иногда от отец имея любима о Господе, и мним быти православен, явися еретик мудрованием. И сущии любими ему отступиша от него. По сих слышавше, яко хощет явно отступити от Церкве, помыслиша отыти, и сотворити ему метание, да не когда от печали сие творит, и напишет им осуждение; и шедше вопросиша старца о сем.

Ответ. Страсть она, страсть есть. Не творите убо образцев. Не бо, яко согрешше нань, кается ему, но да не отступит от Церкве.

Вопрос 742. Тиижде паки вопросиша его: аще убо сие сотворит, и срящем и целуем ли его, или ни?

Ответ. Якоже расположени есте ко всем таковым, тако и к нему бывайте, в томжде чин имуще и сего.

Вопрос 743. Аще кто внидет в церковь во время собрания, и прежде отпуста изыдет, не грех ли есть?

Ответ. Совершенное и угодное Богови дело есть, да вшедый в церковь, слушает Писаний, и ожидает собрания, и совершеннаго отпуста: без вины бо благословныя, не подобает прежде отпущения отходити; понеже презорство есть. Нужде же предлежащей, прощение имать; обаче ниже тако должен есть оправдити себе, но просити прощения от Бога, глаголя: Владыко прости мне, яко не возмогох сохранити.

Вопрос 744. Подобает ли кому беседовати в церкви?

Ответ. Не треба отнюд в дому Божии, святей литургии предлежащей, беседовати кому, но упражнятися в молитве, и слушати тщателно Божественных Писаний: глаголют бо, яже суть ко спасению душ наших. Аще ли же будет нужда беседы, то должно сократити, чести и страха ради предлежащаго часа, и тако имети, аки осуждение, дело тое.

Вопрос 745. Аще убо аз не хощу беседовати, нецыи же от отец начнут ко мне беседу: что сотворю, да не соблазнятся от моего молчания, вменяюще быти вещь в презрение?

Ответ. Аще тии начнут, то отвещай вкратце, имея и тако аки осуждение дело то.

Вопрос 746. Понеже глаголет ми помысл, не часто исходити из дому моего, и случается, яко бывают многая собрания в седмице: должен ли есмь исходити в тыя, или паче упражнятися в дому?

Ответ. Аще веси, яко от еже исходити вредят тя сретения, полезно ти есть не часто исходити, ниже виною собрания ходити, но единою, единою: многих бо зол избавляет безмолвие.

Вопрос 747. Аще ли же будет мне нужда, еже изыти потребы ради моея, или отец, еда ли тяжесть есть то, еже не отыти в собрание?

Ответ. Аще нуждная потреба будет, или повеление отец, потщися по страху Божию сотворити вещь, и да не усумнишися, не отходя в собрание; но возвратися в дом твой, и тако поминай грехи твоя. Аще ли же по лености и парению, то полезно есть тогда паче отыти в собрание и не парити, но внимати.

Вопрос 748. Еда добро есть, да исхожду в церковь нощию, или в дому моем сотворю по силе бдение?

Ответ. Добро есть в дому твоем бдети: в церкви бо многажды беседы бывают.

Вопрос 749. Аще хощу в дом мученическ, или в церковь внити, вниду ли и поклонюся жертвеннику, или святым мощам, или тамо и причаститися, не тяжесть есть?

Ответ. Еже внити и поклонитися несть тяжесть; приобщатися же подобает со всеми людьми. Сохрани же себе, от еже не по чести внити приобщитися в жертвеннице. Аще ли же по повелению священника позван будеши, то проси, и единою и дважды: и аще прилежат, то сотвори послушание. Той бо весть что творит: и тяжесть аще будет, тому написуется. Внемли же себе, да не когда от сего возрастет ти тщеславие. Но вниди осуждая себе, яко недостойна, тако бо есть вещь тая.

Вопрос 750. Некто иногда хотя сопричаститися с некиим в деле, вопроси старца: добро ли есть?

Ответ. Дело сие не имать пользы, ни душе, ни телу, но паче скорби, и суеты. И понеже не смыслен есмь, и писания не вем, мирскую глаголю притчу: общника ли имаши, господина имаши; прочее, еже хощеши, сотвори. Заповеди бо никому не даем, да не оскорбим кого. Сам прочее испытай себе, сладце ли имаши скорбь, или ни. Господь с нами. Аминь.

Вопрос 751. Понеже помысл написует ми тесноту потреб моих, и яко не могу препитатися с домашними моими, и от сего бываю в печали: что есть сие?

Ответ. Человеческа есть печаль сия: аще бо имели быхом на Бога надежду, то Сам управлял бы нас, якоже хощет. Возверзи убо на Господа печаль твою, и доволен есть попещися о тебе же, и о твоих, без печали и скорби. И рцы Ему: да будет воля Твоя; и не оставит тя печальна или скорбна быти. Господь да помилует и покрыет тя десницею Своею. Аминь.

Вопрос 752. Схоластику некоему христолюбцу, любиму отцами общежития, рече авва сотворити нуждное и спешное дело: обычай бо имеяше, Бога ради, усердно творити прошения их. И по действу диаволю, случися ему обленитися в деле том: и скорбя авва вопроси тогожде старца: что должен есть написати ему? И глаголет: напиши ему сия:

Вемы, яко скорбни есмы, и стужаем тебе о деле, и утесняем тя: и ленишися, и оскорбляеши нас, ничтоже творя. Свободно убо рцы нам: аще отягощаем тя, то ктому не отяготим; аще бо не чрез тебе, то не может ли Бог и чрез иного сотворити потребу нашу? Или убо потщися, или скажи нам, и Бог попечется, и молися о нас.

Сия услышав он, аки огнь возыме в сердце своем, и искренно побде в деле том, молитвами их, и скоро преуспе и бысть потреба она. И пришед сотвори метание и проси прощения.

Тако может слово сильнаго, от Духа Свята происходящее, и вся сокращенне действует: «Словеса бо, глаголет, мудрых, якоже остны воловыя» (Еккл. 12, 11). Се бо вещь она содеяся, и душа того исправися от матери зол – лености.

Вопрос 753. Брат вопроси тогожде старца: презираяй дело Божие, да или вред приимет, или погибнет, коему осуждению подлежит?

Ответ. Таковый уподобися украдшему или зле употребившему вещь вне воли Божия, и тоежде подъемлет осуждение.

Вопрос 754. Аще кто тщится не презрети, и погибнет вещь не хотящу тому, еда ли осуждается?

Ответ. Должен укорити себе и просити от Бога прощения, яко вознерадив.

Вопрос 755. Аще кто о деле Божии сумнится к кому, и не приемлет решения, то доколе должен есть ожидати?

Ответ. Аще рождает вред души сумнение тое, то несть потреба отнюд пребыти в нем; аще же не имать вреда, то не должен унывать, ниже быти без попечения: зане яко ленив, осудится. «Проклят бо, глаголет, творяй дела Господня с небрежением» (Иер. 48, 10). Должен же просити Бога пособити избавлением, якоже есть полезно.

Вопрос 756. Егда сотворю с кем щет, влагает ми помысл пристрастится подлою вещию, и обманути онаго: что убо сотворю?

Ответ. Потщися напротив мало что лишше дата ему, тебе не отягощающее, едину медницу, да избежиши злаго лихоимания: иже бо тщится дата мало что лишше, удаляет себе от еже зле лишшее взимати. От малейших бо преуспевает кто в большая, и от малых страстей бывают великия страсти. Господь да вразумит тя во страсе Своем.

Вопрос 757. Аще сотворив щет, по сих обрящу, яко не хотя обманух его: что сотворю?

Ответ. Аще будет много, воздаждь ему; аще и ты напротив, отдав ему лишшее, восхотел бы еси тое взяти от него: и аще обрящет тако, отдаждь и ты тое. Аще ли же не хотел бы еси взяти, ниже ты даждь, разве аще зело убог будет: таковому бо и малое нечто творит чувство. Тогда убо должен еси воздати ему по праведному.

Вопрос 758. Еда в неделю делати грех есть?

Ответ. Делающим по Богу греха несть: апостол бо рече: день и нощь делающе, да не отяготим кого; делающим же в преобидении, и лихоимании, и скверноприбытчестве, грех есть. Обаче добро есть в воскресный день, и в Господския праздники, и в памяти святых апостол, упразднятся от дел, и к церквам приходити: сему бо учит предание святых апостол.

Вопрос 759. Еда добро есть давати благословение отец иноязычну и нищу?

Ответ. Да не усумнишися благословение подати нищему: милость бо есть; ниже иноязычну: благословение бо ничтоже от иноязычника вредится: благословит же того паче; и случается благословением тем, имущим Божию силу, и оному в познание истины приити. Филимон бо некий гудец (игрок на трубах), хотя вместо святаго Аполлония мученика пожрети идолом, и, желая от зрящих утаитися, облечеся во одежди его, и силою тоя пременися, и бысть мученик.

Вопрос 760. Понеже скот мой немоществует, еда безместно есть призвати кого, да обаяние сотворит над ним?

Ответ. Баяние отречено есть Богом: и не достоит того употребляти отнюд; погибель бо есть души, еже изыти вне от повеления Божия. Иная целения паче, врачев принеси ему; несть бо се грех. Возлей же нань и освященную воду.

Вопрос 761. Аще ли же раб мой имея немощь, идет без мене к обаяннику, еда сие вменится мне в грех?

Ответ. Тебе сие не вменится, но тому. Аще же узнаеши, то потщися того наказати, увещав его, да не паки тожде сотворит.

Вопрос 762. Понеже еже ходити к волхву, чуждо есть Бога, аще убо вижду коего-либо к нему идуща: еда должен есмь рещи ему не ходити?

Ответ. Аще будет возлюбленный твой о Христе, то должен еси тому рещи: брате, вредиши душу твою, и прогневляеши Бога, возбраняюща дело сие; и аще не приимет словесе твоего, то сам узрит. Аще ли же кто-либо прилучивыйся есть, то не имаши вещи, аще не сам вопросит тя о сем. Должен бо еси рещи ему истину; аще бо не речеши, то осужден будеши. Саул бо, хотя взыти к волшебнице, вопроси Ионафана сына своего, и не советова ему ити, и осужден бысть от него. Аще убо есть кто под властию твоею, то должен еси и увещати, и наказати того преступающа.

Вопрос 763. Аще кто купует вещь, или продает, еда грех есть соглашати, или вящше, или мнее цены?

Ответ. Еда по нужде не бывает, но по произволению, то несть грех, еже дати и взяти по соглашению; аще ли же кто весть, яко множае приобрете, то должен есть от себе возвратити: добро бо дело творит; и бывает ему тое в благодарение. Егда же кто соглашает с некиим сущим под властию его, то смотряти должен есть, да не како насилуя его соглашает: зане грех есть. Но должен есть известити ему: яко, брате, не скорблюся, аще не сотвориши тако, якоже глаголю тебе; ниже вящше дам ти. Прочее, якоже угодно ти есть и (якоже) хощеши, сотвори.

Вопрос 764. Понеже, якоже учите, добро есть еже в коейждо вещи укоряти себе: аще порицаемь бываю от кого, аки согрешив нань, и во мне погрешности не свем, что сотворю? Аще бо восхощу себе осудити, то обрящуся извествуя огорчение его на мя, аки истину сущу нань погрешению. Аще ли же паки восхощу отвещати ему, яко не тако имать вещь, обрящуся себе оправдаяй. И како прочее понесу укоризну? Просвети мя, отче святый, како должен есмь сотворити?

Ответ. Прежде укори себе в сердце своем и сотвори ему метание глаголя: прости мя Господа ради. И сице со смирением (не яко хотя себе оправдити, но онаго уврачевати, и изъяти из него подозрение) рцы ему: отче, не свем себе, яко хотех тя в чем оскорбити, или в чем согрешити противу тебе: прочее не имей сице на мя. Аще ли же ни тако извещения приемлет рцы ему: согреших, прости мя.

Вопрос 765. Аще ли же согрешу нань, и слышав скорбит: убо добро ли есть скрыти истину, во еже утолити скорбь его? Или исповедати согрешение, и прости прощения?

Ответ. Аще известна уведа, и ты веси, яко имать дело во истязание приити, и явлено быти, рцы ему истину и поищи прощения: еже бо солгати, множае раздражает его. Аще ли же не уведе, ниже имать истязано быти дело оно, то не безместно есть, еже умолчати и не дати места скорби. Ибо и Самуил пророк, егда послан бысть помазати Давида в царя, хотяше и жертву пожрети Богови, и убояся Саула, да не увесть сего. И рече ему Бог: возми с собою юницу: и аще речет ти царь, что хотя пришел еси? рцы ему, яко пожрети Господеви приидох. И тако едино скрыв, приводящее на гнев царя, другое точию рекл есть. И ты убо умолчи скорбное, и прейдет вещь.

Вопрос 766. Аще явно будет, яко не согреших кому, но паче согреши он мне, како могу себе укоряти? Что бо, например, аще путешествующу ми негде, срете мя некто на пути, егоже не ведех николиже, и мне ничтоже ему рекшу поби мя без вины: како могу укорити себе в сем?

Ответ. Можеши, глаголя: яко аз согреших путем сим. Аще бо не бых шествовал, то не имел бых срестися с ним, и не бил бы мене. Видиши ли, яко можеши себе приписати вину?

Вопрос 767. Аще ниже вижду явленно согрешение, ниже являетмися абие то, еже како должен бех укорити себе, что сотворю?

Ответ. Рцы: яко убо аз согреших, яве есть; но ныне сокрыся от мене согрешение. И се есть еже укорити себе.

Вопрос 768. И христолюбец часто прихождаше во общежитие отцев, и единою закосне приити тамо; и авве рекшу светлым лицем: ты знал еси путь? Рече: авва, аще бысте молилися о мне, то не бых имел закоснети, но молю рцы сия старцеви.

И слышав старец, сказа ему: показал еси нас спящих и не могущих ничтоже сотворити; но ты не обрелся еси тщаливейший приити и возбудити нас; и сие, ведый от учеников Спасовых: егда бо обуреваеми бяху, приступиша к Нему, и возбудиша, глаголюще: «Наставниче! спаси ны, погибаем. И востав спасе их» (Лк. 8, 23–24).

769. И сия слышав он, паки сказа таяжде. И отвеща старец: прости мя, яко любопрение смирения не имать. И слышав он умилися о словеси, и ползовався отыде.

Вопрос 770. Христолюбец вопроси тогожде старца: понеже Бог самовластна сотвори человека, глаголет же, яко «без Мене не можете створити ничесоже» (Ин. 15, 5): како и самовластие хранится, и оно, еже без Бога не мощи что творити?

Ответ. Бог самовластна сотвори человека, да может уклонитися во благое; уклоняяся же произволением, несть доволен тое совершити без помощи Божия: писано бо есть: «ни хотящаго, ни текущаго, ни милующаго Бога» (Рим. 9, 16). Аще убо приклоняет человек сердце свое во благое, и призовет Бога на помощь, внимая Бог доброму его усердию, приподаст силу деланию его. И тако обоя преуспевают, и самовластие человека, и еже возмощи от Бога. Благое бо от Того бывает, святыми же Его совершается. И тако славится Бог во всех, и прославляет тех.

Вопрос 771. Сродников имам по миру, овы светлы, и суть зде, овы же незнатни, и живут далече; и случается, яко приходят к нам. Аще убо вопросит мя кто: кии суть? Реку ли ему истину, или умолчу. Зане то, еже рещи, печалит другия сродники, срамляющияся поношения.

Ответ. Не подобает сего возвещати, не сущей нужде, наипаче, аще подвизает сие скорбь другим. Аще убо и особь вопрошен будеши, кии суть? То должен еси разумно отвещати, во еже не явити вещи. Аще ли же никтоже печалится, или скорбит от сего, и вопрошен будеши, то не должен еси сокрыти истину: зане тщеславие обрящется. Вси бо создание Божие есмы, и ниедин есть светлее другаго, точию творяй волю Божию; но тщеславие творит у человеков различие. Но обаче подобает сохраняти других совесть за немощь помысла их, егда ниедина предлежит нужда яве творити.

Вопрос 772. Раба имам прокаженна: еда должно ли держати его в дому моем, или ни?

Ответ. Не подобает удержати его в дому твоем: не вси бо могут понести, еже пребывати с ним; аще же быша носили, благочестно было бы дело то. Темже не подобает его ради оскорбити инех; но даждь его в нищепитателницу прокаженных, и подавай ему пищу его и одяние доволно потребе его, и постелю, яко да ничтоже тяжестно ему будет.

Вопрос 773. Аще ли же (он), приемля (от мене) всю свою потребу телесную, якоже повелел еси (дати ему), восхощет приимати и часть свою от приносимых отвне тамо некиими, или и мною: попущу ли ему приимати, или ни?

Ответ. Ниже да повелиши ему, тяжесть бо творит сие; ниже да возбраниши: да не поропщет, или похулит, но сам, еже аще что хощет, да творит. Аще ли же и от тебе приношение будет, егда предложение имать взяти, даждь ему.

Вопрос 774. Понеже отец мой по плоти присно приводит ми беседу о телесных вещех, не имущих пользы душевныя, и, за еже слышати его, стужаю, и укротити его от беседы не смею, что сотворю?

Ответ. Аще можеши пренести ум твой от глаголемых им или в молитву, или в память словес Божих, и учение святых отец, добро есть; и остави его глаголати, еже хощет. Аще ли же не можеши, потщися с кротостию уставити его от беседы, и пременити тую на ину полезнейшую, да не когда от закоснения в ней обрящется тамо сеть вражия: может бо и единем словом устроити непредвиденно сеть, аще точию обрящет, слушающа сладце.

Вопрос 775. Понеже нецыи, внегда брати нам виноград, приходят останки обрывати: еда безместно есть возбранити им, да не приходят в гроздие? Аще же ктому подозреваю, яко украдоша гроздие, то не должен ли есмь обыскати их? И аще обрящу, возму ли тое, да не и друзии тожде сотворят? Смущается бо о сих помысл мой.

Ответ. Еже не позволяти им приходити в гроздие не безместно есть. Аще же подозревавши, яко взят кто гроздие и не веси известно, то не обыскивай, якоже прилучися, да не како, не обрет, посрамишися. Аще ли же и увеси, яко взят, и оставиши его, добро есть; аще ли же ни, то ноне отпусти его без досаждения.

Вопрос 776. Егда неправдую, и исправлюся о неправде той, высокомудрствует помысл мой, аки благо нечто (мне) содеявшу: что убо должен бех глаголати ему?

Ответ. Рцы ему: не правдуяй наказуется; разрушаяй же неправду, убегает наказания, и имать похвалу: ино бо есть, еже благосотворити, и ино, еже неправдовати. Ово бо угождает Богови, и ходатайствует вечный покой; ово же прогневляет Его, и ходатайствует вечную муку. Сие бо есть, еже глаголет Давид: «уклонися от зла, и сотвори благо» (Пс. 33, 15). Без Бога бо не можем что благо сотворити. Рече бо: «без Мене не можете творити ничесоже» (Ин. 15, 5). И апостол: «что же имаши егоже неси приях? Аще же и приял еси, что хвалишися яко не приях?» (1 Кор. 4, 7). Темже ниже в делании благаго можем высокомудрствовати: коликоже паче во удалении от злаго. Великое бо есть безумие в похвалу вменяти то, еже не согрешати. Внемли убо себе, брате, да не когда прельстят тя лукавии бесове, ихже да упразднит Господь, молитвами святых Своих, аминь.

Вопрос 777. Понеже немоществую, и повеле мне врач помытися в бань, не грех ли есть? И должно ли себе показовати врачу?

Ответ. Не запрещена есть баня отнюд мирским, егда требует нужда; аще убо кто немощь имать и требует бани, то несть грех. Аще же кто здравствует, то бывает тому во угождение и отраду тела, и приводит е в безчиние. Подобающая убо сохрани, си есть сердце и язык, еже не судити, ни уничижити кого: зане еже в бане мытися, не осуждает мирскаго человека. А о еже показовати врачу: совершеннаго убо есть, еже оставите все Богови, аще и труд имать дело сие; немощнейшаго же есть еже показати врачу. Ибо ниже сие грех есть, но и смирение, яко аки немощнейш воспроси показати себе врачу. Но и тако подобает имети, яко без Бога, ничтоже ниже врач может, но егда хощет Бог, подает здравие страждущему.

Вопрос 778. Нецыи от диавола мнят о мне, яко благоговеин есмь, понеже не прихожду часто на торжище, ниже вдаю себе в дела. И егда по мнозе времени зовет мя потреба телесная измытися, присно стыждуся, аки имый соблазнити мнящия о мне, яко от благоговеинства бани отрицаюся. Убо что есть сие, отче?

Ответ. Сие есть тщеславие. Ты бо мирянин еси, и якоже рехом, не запрещена есть мирскому баня, потребе належащей. Аще же сатана устроивает некия непщевати, яко пророк еси, во еже обольстити помысл твой в высокомудрие, а при сем хощеши (и сам) яже о тебе лжу подтвердити: веждь, яко тех подобает стыдетися, яже имут преступление заповеди Божия, яко блуда, сребролюбия и подобных. Сия бо суть имущая соблазн: и о сих воздаст кто ответ, не точию о себе, но и о вреде ближняго. Еже бо от роскоши мытися в бани, а не понужде, грех есть, и праведен имать соблазн. А еже не тако, но по потребе, не имать соблазна, но соблазнивыйся, той понесет суд. А еже о сем стыдетися, тщеславие есть бесовско.

Вопрос 779. Рекл еси, отче, яко оный подает праведна соблазн преступаяй заповедь Божию, иже и подлежит суду за вред ближняго. Како убо апостол рече ядущему идоложертвенное: «яко ты убо добре яси, ничтоже бо идоложертвенное в мире: но брат не созидается: не брашном убо твоим того погубляй, за негоже Христос умре» (1 Кор. 8, 4, 7). Се виновна того творит в вещи не запрещенней заповедию Христовою, и прощение паче оному подает за немощь.

Ответ. Прежде убо, брате, апостол запрети: и никомуже не подобает множае любопытствовати, но, аки закону Божию, повелению его работати. Обаче, якоже непщую, глаголю. Зде и место и деяние укорна бяху. Капище бо тое устроено на службу бесовом: и идоложертвенное то жертва бесовом приносима бываше. И немощному истинно мняшеся быти идоложертвенное. И зря вернаго ядуща, управляшеся и той во еже идоложертвенная ясти, оскверняяся совестию своею. Верный же, не имеяше то идоложертвенно, но брашно свято, от Бога создано: и добре то ядяше, и чистою совестию. Но понеже развращеннее о таковой вере бяше брат той располагаем в сердце своем, и мняше тое быти идоложертвенно: сего ради апостол запрещает верному ясти брашно неполезно, приносящее вред ближнему: еже сущия по Христе любве чуждо бе. Еже бо ясти, не имеяше никоего исполнения заповеди Божия: и еже не ясти, не имеяше преступления. И требует от него предпочести паче брашна назидание братнее. Зде же о бани, само о себе то еже мытися, не безместно ниже запрещено есть, и соблазняяйся о сем сам понесет суд соблазна того. Еже убо стыдетися мирскому человеку мытися в бани, за укоризну от человек, и наипаче нужде взыскующей сего, тщеславие есть, приносящее вред человекови. Ты убо, егда нужда требует, измыйся по страху Божию, а не по изнеженности: сие бо есть чуждо страха Божия и вредно душе.

Вопрос 780. Понеже в коейждо пищи есть некая естественная сладость, не делает ли оная вреда приемлющему?

Ответ. Владыка Бог таковую сладость в коейждо пище соделал есть: и несть вреда со благодарением приемлющему. От пристрастия же присно хранитися потребно есть. Сие бо есть вред души.

Вопрос 781. Еже творити вещь с чистотою не безместно ли есть? Аще случится мне строение или другое нечто?

Ответ. Еже быти чистой и благолепной вещи, несть безместно, употребления ради еже от нея: обаче без пристрастия. Ибо и Господь радуется о всякой чистоте. Егда же видиши себе пристрастие имуща в вещи, то поминай последняя тоя, како растлевается, и приимеши покой. Ниедина бо пребывает в едином и томжде образе: но вся тленна суть и преходяща.