Текст книги "Аскетика. Том I"

Ответ 43, тогожде великаго старца к томужде, яко да вся яже о себе возложит на Бога.

Аще кто пиет от воды, юже послах тебе через послания, не вжаждется вовеки. Ты же должен был еси чаяти и надеятися успокоения верою Христовою. Приими хлеб сей от моея пищи, и буди без попечения. Ничесого да убоишися, но приими силу Духом Святым и надежду. Веруй, яко рука Божия есть с тобою.

44. От посланнаго ему благословения, даде служителеви своему, не от руки, аки не сый причетник, но положил есть, и он сам о себе прият. И приим вторицею и третицею благословение, тожде сотворил есть, и творя сие без совета, не разумеваше греха онаго. И паки, егда увидев молитвами старца себе облегченна от страстей, рече: яко изнемогоша от мене страсти. И по сих посла вопрошая о помыслех хульных, и не прият ответа. И внегда удивлятися ему о вине того, внезапу по попущению Божию к наказанию, явися ему мечтание страшно, и единою, и дважды, и абие отыде: и многаго исполнен мятежа и смущения, помяну согрешение – о едином точию хлебе, забыв реченное им о изнеможении страстей, и облекся в присланный ему некогда от старца кукулий, много припадаше и моляше получити милость. И пишет ему старец о двою прегрешению, еще же и о помысле хульном, и яко, еже положити благословения служителеви, яко да сам приимет, не бе смирение, но паче кичение, и детска разума дело.

Аще кто весть, яко преступает заповедь, знамение являет познания. И познаваяй исправляется. Но просто глаголем якоже некогда в руку Божию предах тя, и уклоняешися от нея: и Писание глаголет от уст Божиих: яко, праведнии не уклоняются: что искушаеши, да реку: и паки глаголет: «Ниже да изыдет велеречие из уст ваших» (1 Цар. 2, 3). И посмел еси отверсти уста пред Богом, и рещи, яко изнемогоша от мене страсти, а не паче рекл еси, аки во хранилище лежат во мне вся. Сего ради мало оставлен был еси, и явилося есть все окаянство твое. И аще не бы было покрывало, еже имел еси, то потрудитися имел бы еси. Но «верен Бог, глаголет, иже не оставит нас искуситися, паче еже можем: но сотворит со искушением и избытие, яко возмощи нам понести» (1 Кор. 10, 13). И еже безвременно сотворити вещь, от воли есть своея, еже кичитися, не имущу рукоположения, и еже дати иным благословение, аки архиепископ, не вем аз, како сия скажу. Что убо? Аз не ведях ли, еже всем послати благословение, еже всячески тебе послах? Се убо мало замнога и велика наказан был еси. Трезвися прочее еже потребити осмь оныя языки иноплеменныя твердо: и да не седиши детскими влекомь вещми, и стяжи терпкость паче, и нежели простоту. Ибо множицею слышал еси, яко с советом вся твори (Сир. 32, 24). И о всяцей страсти и хуле помолися Богови, и заступит тя по малу. И трезвися прочее, и соблюдай сия в сердце твоем. И несть потреба, да увесть кто: но еже бысть, бысть. Будет убо Иисус с тобою. Прости мне прешедшая, и исправлю будущая, вовеки, аминь.

Ответ 45, тогожде великаго старца к томужде, егда в велик впад недуг, и зельнейшею одержим огневицею, и на многи дни ниже пищи вкусив, ниже уснув, воззва укоряя на авву и на служащих ему братий, по действу диаволю.

Брате! почто оводянело твое сердце, еже оставит возлюбленнаго, и тещи в след врага? Оставил еси глас пастыря Христа, и последовал еси в след волка диавола. Что пострадал еси? Что претерпел еси? Что суть кличи сии, яже сочте апостол с злохулными, рек: «Всяк клич, и хула, и гнев, да возмется от вас со всякою злобою» (Еф. 4, 31). Паче силы ничтоже пострадал еси. Апостолу вопиющу: «верен Бог, Иже не оставит нас искуситися паче еже можем» (1 Кор. 10, 13) и прочая. Возбудися от смятения сего злых помыслов. Приими жезл креста, имже отгониши волки, то есть бесы. И помяни рещи: «вскую прискорбна еси душе моя: и вскую смущаещи мя? уповай на Бога, яко исповемся Ему, спасение лица моего и Бог мой» (Пс. 41, 6). Трезвися прочее, и да не разжигаешися, аки не разумно отроча, не имущо чувства: должен сый взыти со Христом на крест, и пригвожден быти гвоздьми, и прободен быти копием. Чесого ожидаеши, окаянне, вопия на Христа сильно и укоряя братию твою? Где есть: «честию друг друга болша творяще» (Рим. 12, 10)? Довлеет бо зде. Глаголет бо: «даждь премудрому вину, и премудрший будет» (Притч. 9, 9). Потерпи и умолкни и благодари о всех; тако бо глаголет: о всем благодарите (1 Сол. 5, 18). Явно же есть, яко и в нуждах, и в скорбех, и в недузех, и во отраде. Держи убо Бога, и пребудет с тобою, и подаст ти силу во имени Своем. Яко тому слава вовеки, аминь.

Ответ 46. Облегчившуся ему от болезни, и воспрянувшу от искушения, показа ему супостат злая сония, да паки его смутит. И не получив сего, паки показа ему, аки монастырь и церковь, и многия тамо прибегающая, воеже сиречь улучити помощь: и утверждая его старец пишет ему сия:

Слава в вышних Богу, брате: враг наш диавол ополчися яко лев рыкая поглотити тя (1 Пет. 5, 8), но не оставила есть его покрывающая всегда нас рука Божия. Егда убо увиде, яко не попущаемь бывает сотворити, еже хощет, положи себе смущати твой ум. И предъяви тебе некия вещи скверными своими сониями. И яко лукав в коварствии своем, егда увиде, яко не предает тя Господь искуситися до конца, ниже паче силы твоея: сотворил тя есть видети церковь, и монастырь, акибы помощи. Ты убо утверди сердце твое, знаменуя е немятежно во имя Отца, и Сына, и Святаго Духа: и веруя, яко помогает нам попрати главу его. Стяжи убо смиренно сердце, и даждь славу спасшему тя от сети смертныя. Ты убо от нерадения сия пострадал еси.

Ответ 47, тогожде великаго старца, к томужде, впадшу во брань, от различных составлшуюся помыслов, и зело сущу тяжчайшу, и мнозем непостижиму.

Рцы брату Иоанну: удивляюся любви твоей, како не разумееши вещей! Аз бо видя скорби твоя многи, множицею от себе послах ти благословения, да приимеши от них силу по Богу. Но должен еси размышляти всегда 106-й псалом, отнюду же глаголет: «рече, и ста дух бурен, и вознесошася волны его: восходят до небес, и низходят до бездн». И паки: «душа их в злых таяше» (Пс. 106, 25–26). Сия приидоша на ны, и должни есмы претерпети таковая бедствия: дондеже достигнем во пристанище хотения Его, якоже преднаписах к тебе. Прочее Бог не предаде тебе в руки врагов твоих: и ты не предаждь сам себе в руки их. И аще тако сотвориши, Бог не предаст тя. Хощеши ли же избавился от скорбей и не трудитися в них? Ожидай горших, и почиеши. Поминай Иова и прочих святых, колики претерпеша скорби: и терпение их стяжи, и утешится дух твой. Мужайся и крепися и молися о мне, поминая словеса моя, и душа моя обновится.

Ответ 48. Авве закосневшу по некоей вине отнести ему предреченный ответ, зело укоряше его, и во многу печаль вложил есть его. И некиим братиям служимым немощи ради рекшым ему о некиих вещех, аки суетно и безполезно во общежитии бываемых: вместо еже вразумити и исправити их от таковаго оглаголания, рече: яко ниже ему угодна суть сия. И авве по сих рекшу ему: яко по совету старца и сия сотворих, рече ему: яко по воли твоей оставил есть тя старец ходити. И к сим посылает ему ответ сей. Назнаменуя ему в том: яко мнящаяся нам неправо бывати, смотрителне деются, паче нашего суща понятия.

Паки по мнозе времени подвиже нас любы, погрозити жезлом Христова наказания и запрещения; да исполнится и на нас слово Писания, глаголющо: «достовернее суть, язвы друга» (Притч. 27, 6) и прочая. И паки: аще накажем тя, да не ослабееши: поминая притчу глаголющаго: «Сыне мой, не пренебрегай наказание Господне, ниже ослабевай от Него обличае. Егоже бо любит Господь, наказует: биет же всякаго сына, егоже приемлет» (Евр. 12, 5–6). Аще же и запрещу тебе, то не не веси, како глаголет апостол: «Обличи, запрети, умоли» (2 Тим. 4, 2). Где есть ум твой, немощне? Или где пребывает помысл твой, лениве? Почто господие ума твоего противоглаголют в тебе учеником Владыки, еже бы не прияти ему, да всядет нань Владыка, яко да внидет во Иерусалим, и ижденет от храма Божия продающия, и купующия, и посрамит книжники и фарисеи? Почто жити долженствующу ти во Иерусалиме, влекут тя в Вавилон? Почто, оставль воду силоамскую, хощеши пити от мутных вод египетских? Почто уклоняешися от пути смирения, глаголющаго: аз кто есмь? и хощеши ходити путем развращенным, и полным сущим скорбей и бед? Где положил еси моя словеса, реченная к тебе день и нощь? Где есть, еже глаголю ти, яко самому мне, еже достигнути, и где видиши себе достизающа? Где хощу тя бытии и где еси? За еже не удержан имети язык, и отрешати и скоро, и аще подаси ближнему совет, не испытуеши опасно, еже уразумети. Паче же покрывающему нас по Бозе, и выю свою о нас положшему емуже должни есмы благодарити, и молитися о нем, еже сохранену быти ему от всякаго зла, к ползе нашей и многих: научившеся сему от святаго апостола, како благодаря о некиих глаголаше: иже о мне своя выя положиша, како убо не поминаеши безпопечения, еже чрез него даде тебе? Но и седения, егоже причащаешися в безмолвии аки царь? А той тяготу приходящих к нам, и отходящих носит, и нестужаемых нас творит. Аще бо нас ради приходят, то мы должни есмы носити попечения их, а не он. Темже убо по премногу благодарю Бога, давшаго нам сына искренняго по душе нашей, якоже восхоте. И вместо сих рекл еси ему несмысленно: умых руце мои от тебе; и сие не единою, но многажды потопляя душу его во мнозей печали. И не воспомянул еси апостола, глаголюща: да не како многою скорбию пожерт будет таковый. И аще не бы была рука Божия, и молитва отец его, разсестися имеяше сердце его. Где суть заповеди моя яже к тебе: яко плачи, рыдай да не взыщеши вменяем быти, и к ничесому да примериши себе, на ин путь привлекая твою любовь? Прейди от мира прочее. Взыди на крест. Облегчися от земли, оттряси прах от ног твоих, неради о срамоте (Евр. 12, 2); не разжигай с халдеями пещи, яко да не спопален будеши с ними гневом Божиим. Превосходяща паче себе имей всякаго человека. Восплачися мертвеца твоего. Изми бервно твое (Мф. 7, 5). Созижди развращенный дом твой. Воззови: «Помилуй мя, Сыне Давидов, да прозрю» (Лк. 18, 38, 41). Уразумей: да всяка уста заградятся, и да не велеречиши. Затвори дверь твою врагу. Постави на мериле словеса твоя, и дверем твоим завору сотвори (Сир. 28, 29). Ты веси, како глаголю тебе. Поразумей глаголемая. Потрудися испытуя сия, и обрящеши сущия в них плоды достойны Бога. И да не посрамиши моих един, молящаго о тебе день и нощь. Господь да даст тебе уразумети и сотворити со страхом Его. Аминь. И понеже рекл еси ему, по воли твоей остави тя старец ходити, убо аз един ношу осуждение, еже рече Господь пророком: «Аминь глаголю ти: аще увидиши брата твоего ходяща путем не благим, и не речеши ему, яко путь сей зол есть: от руки твоея взыщу крове его» (Иез. 3, 18). Да не будеши наругаем, но повинися апостолу, яко слово воздамы о нем. Но вы не разумеваете глаголемых, что суть.

49. Благодарив старцу за исправление, просяше его, да множицею пишет ему о спасении души. Подобне же и о помысле, егоже искаше рещи авве, молися старцу, да той речет ему.

Брате Иоанне! что есть сие, не вем: писано ти есть от алфа до омега: от устроения новоначална до совершенна: от начала пути до конца его, от еже совлещися ветхаго человека с похотми его до еже облещися в новаго созданнаго по Богу (Еф. 4, 22, 14). От еже быти земли чужду чувственныя, быти же небесну жителю и наследнику мысленныя земли обетований оных. Разжуй в посланиих онех, и спасешися. Имаши бо в тех, аще разумееши Ветхий и Новый Завет. И разумевая та, не востребуеши иныя книги. Оттряси забвение и отступи от тмы да имать мир сердце твое с чувствиями твоими, и сия вся приидут ти. Изсчезнет дым идоложертвенных от мысленныя Ниневии твоея, и разыдется по стогнам ея воня фимиама духовнаго покаяния, и удержит претящее ей прещение на превращение. Где спиши? Почто возглавия положил еси ответы оны, яже к твоему спасению? Не точию же, но и ко спасению с верою вникающих? Престани от соний прочее. Возбудися от тяжчайшаго сна. Поспешися нагама, постигни в Сигор: да не постигнет тя превращение онех пяти градов: и да не обратишися вспять, яко да не будеши ты столп слан. И буди мудр, яко змия, да не прелстят тя врази твои. Цель же, яко голубие, да не брань сотворит на тя воздаяние. Буди раб верен Владыки, понеже многим порабощен имаши быти. Да не отлучиши себе от Него: неверный бо прият о сем изречение. Блюди, како седиши. Рцы себе: почто сежу тако? Что приобретох от седения сего? И Бог человеколюбивый просветит сердце твое, еже разумети. Се уже Той сотвори тя безпечална от всякаго попечения земнаго. Внимай себе, где еси и чесого хощеши? И Бог способствует ти во всех, брате мой. И о помысле оном, о немже рекл еси рещи сынови моему, могл бых убо рещи ему: но аще ты не речеши ему своими усты, отчуждиши себе от совершенныя к нему и искренния любве. Аще есте душа едина, и сердце едино по Писанию, то и никтоже скрывает от сердца своего что-либо. Умудрися, сын еще тяжкосерд. Господь да простит тя.

Ответ 50. Тогожде великаго старца к томужде вопросившу: должен ли есть от святыя великия седмицы не ктому беседовати с ким?

По празднице безмолвствуй дней пять в седмице, и два дни беседуй, нуждн бываемей. И паки глаголю тебя, что да сотвориши: сотвори по силе своей быти без попечения от всякия вещи. Бог бо творит промышление о всяком человеце к полезному: или умиляет сердце его, или возбуждает его и чрез иного к пользе.

Ответ 51. По празднице пришед некий епископ, искаше беседовати с ним, и инии же нецыи новоначалнии хотяху его вопросити о помыслех, и посла о сем вопросити тогожде великаго старца.

Веси, яко никогдаже возлагахом узу на кого, ниже себя самем. И понеже рех ти: безмолвствуй пять дней в седмице, и два дни беседуй, буди без попечения и от сего, и егда глаголю ти, беседуй, и егда беседуеши, буди без попечения, что речеши и что возглаголеши: Христос бо рече: «яко, Дух Отца вашего есть глаголяй в вас» (Мф. 10, 19–20). О братиях же, о нихже рекл еси, нужде бываемей да не отречешися, и Бог поможет. Аминь.

Ответ 52, тогожде великаго старца к томужде, глаголющу о нестроении мира.

Брате, елико имамы время, вонмем себе: яко смятошася всяческая, и будем обучатися молчати. И аще хошеши почити по всем, буди мертв от всякаго человека, и почиеши. Разумей, яко о помыслех, и о всякой вещи, и пребывании, и попечении глаголю тебя: безмолвствуй с миром.

53. По ответе сем искаше пресещи совершенно беседы. И един брат зело о сем скорбяше, и моляше и, да аще нужда будет, побеседует с ним. И умилосердився обещася. И вопросил есть о сем, и о коловии присланном ему от некоего брата, должно ли прияти?

Брате, послах ти слово: буди без попечения. Чесого хощеши? Себе самому вонми, многа есть жатва: да не оставиши тоя, и намерение положиши обирати ягоды виноградныя в след обирателей. Но ты остави вся, и упразднися, еже пожати и обрести виноград, да имаши плоды от пшеницы и вина: да укрепится и возвеселится сердце твое о Господе: размышляй послания, яже писах ти, яко праздна не суть. О коловии же, аще хощет брат дати тебе от всего сердца своего, приими, осуждая себе яко недостойна.

Ответ 54. Брат имея брань тяжчайшу, и стыдяся свободно исповести ю авве, посла моля тогожде авву Иоанна, прияти его отай аввы и услышати помысл его. Он же скорбяше по двою образу: ниже хотя его прияти без совета, да не соблазн подаст инем: ниже напротив хотя опечалити и, и недоумея, что сотворити, вопроси особно тогожде великаго старца. И подобает ли заградити двери своя?

Рцы братови: кто есть неразумен, еже избрати себе вещь притщетную и прискорбншую, а не легчайшую и отраднейшую со смирением и вниманием? Да не заградиши дверей: не бо в заграждении дверей есть умерщвление, но в заграждении уст. Целую тя лобзанием святым.

55. Старец некий египтянин, пришед жити в монастыре, идеже отцы сии бяху, написал есть египетски к великому старцу (бе бо и той египтянин), прося молитвы и слова на пользу души: и возможно ли удостоитися беседы его? Он же еллински написа ответ сей:

Понеже уставих себе, еже не писати к кому, но чрез авву посылати ответ, сего ради не написах тебе египетски, но убежден бых еллински рещи ему, да напишет ти: не бо весть египетски глаголати. Аще возлюбленна тебе и отца твоего о Господе вчинил мя еси в твоих писаниих, ведяща труд, и нужды, и беду души, и аще отец твой есмь, якоже написал еси: заповедь даю тебе: да не стужаеши ми о беседе: не бо творю различие человека и живу. Но аще отверзу тебе, то и всем; и аще ни тебе, то ниже иному кому. Сие же ти написах, понеже написал еси глаголя: сотвори мя достойна кротости твоея, и сотвори милость с душею моею окаянною. И паки, яко рекл еси в томжде послании: яко грех мой отлучи мя от тебе владыки моего. Аз же до селе благодатию Христа Сына Божия не отлучихся от тебе, но с любовию твоею есмь присно духом. И еже послежде написал еси ко мне в томжде писании: яко помолися о грехех моих: и аз ти тожде глаголю: помолися о гресех моих: глаголет бо: «якоже хощете да творят вам человецы, и вы творите им такожде» (Лк. 6, 31). Аз доселе, аще и окаянен, и менший есмь всех человек: но творю силу мою, Глаголющаго ради: «молитеся друг за друга, яко да исцелеете» (Иак. 5, 16). Брате, странни ли есмы? то странни да будем: и да не возмерим себе к чесому: и никтоже нас вменит, и почием. Вшед же к нам подвизайся претерпевати. Глаголет бо: «претерпевый до конца той спасется» (Мф. 10, 22). Над всеми же подвизайся, еже умрети от всякаго человека, и спасешися. И рцы помыслу: умрох, и во гробе лежу. Поверуй мне, возлюбленне, яко понуждаемь от любви Божия, превзыдох меры моя, еже рещи сия к любви твоей. Кто бо есть аз малейший? Сего ради, прося прощения, глаголю: прости ми суесловному Господа ради, и помолися о мне, рабе Божий Аврааме.

Ответ 56, тогожде великаго старца ко авве Павлу старцу безмолвствующу и ищущу некоего брата – слепа прияти и послужити тому.

Брате Павле, есть притча глаголющая: видел ли еси юношу текуща? Уразумей, яко старец его оболстил есть. У нас убо, оболщаваяй нас старец, сатана есть: и завидя, хощет нас воврещи в злыя дни, изветом оправдания. И не вемы, яко мнози, хотяще извлещи некия от реки, потонуша с ними. Блюди, откуду хощет тя уловити. И егда вопрошаеши, и приемлеши ответ, обращает кознь на ин образ злейш. Паче силы твоея не истязует тя Бог благосотворити ближнему: тако бо и глаголет: «да не престанеши благотворити ближнему, елико аще обрящет рука твоя» (Еккл. 9, 10). Прииде слепец оный: разболелся же еси и ты велми: то кто послужит и тебе и оному? Аще же никто и послужит ти с радостию, но приносяй ти оправдания сия, присно глаголет ти: виждь принесл еси общежитию тяготу. И есть человек той, якоже веси, не удобостерпим. Якоже глаголет Писание: мужа или и старца «малодушна кто стерпит» (Притч. 18, 14)? Аще ли же потребно ти есть искус прияти неколиких дней злых, сотвори, еже хощеши. Аще не бых вопрошен был, не имел бых проглаголати: но паки яже глаголах, любве ради Христовы глаголах: да не заблудит брат мой. Аще ли же состраждеши ему Бога ради, и веруеши, яко силен есть Бог, помощи ему: помолися Тому: и якоже хощет, сотворит с ним. Не связах тя, брате, ниже заповедь ти дах, но совет: якоже убо хощеши, сотвори, и прости мя Господа ради, и помолися о мне малейшем.

Ответ 57, тогожде великаго старца к томужде, подвигшу слово к некоему о вере, и не сущу доволну к таковому взысканию, и смутившуся в состязании.

Божественный апостол, Духом Святым побужден быв, рече: «верен Бог, Иже не оставит вас искуситися, паче еже можете: но сотворит со искушением и избытие, яко возмощи вам понести» (1 Кор. 10, 13). Единодущн брате и искренний любимиче! Известен буди о Господе, яко видя скорбь и мятеж постигшаго тя искушения, тако возболех люте, яко никогдаже; наипаче помянув апостола глаголюща: «кто изнемогает, и не изнемогаю? кто соблазняется, и аз не разжизаюся?» (2 Кор. 11, 29). И паки: «аще страждет един уд, с ним страждут вси уди» (1 Кор. 12, 26). Аще бо и не дею яже апостола, но слышах его глаголюща: радоватися с радующимися и плакати с плачущими (Рим. 12, 15). Но слава Вышнему Богу, не попустившему доброненавистному врагу, исполнити на тебе всю злобу свою, по своей его воли: тако бо хощет живы поглотити человеки: якоже свидетелствует верховный апостол Петр, глаголя: «ходит яко лев рыкая, иский кого поглотити» (1 Пет. 5, 8). Владыко мой: да не вскоре присно приемлем смущение лукавых помыслов, еже тако воздвигатися и смущатися на ближняго нашего: сие бо диаволскаго действа есть, и ино ничтоже. И где положихом, яко «блажен, иже претерпит искушение, зане искусен бывает» (Иак. 1, 12) и прочая? Сия же не написах любви вашей, аки требующу учения: аще бо испытаеши Писания, то и множае мене и трезвитися и разумети имаши. Есмь бо окаянен и немощен, и имя точию имущь вотще: но от болезни сердца, и любве многшия по Богу, написах ти со многими слезами. Да утвердит убо сердце твое в страсе Своем Утвердивый небо и Водрузивый е: и да оснует здание твое на твердом камени (Мф. 7, 25) Основавый землю на водах (Пс. 23, 2). И да запретит искушением твоим, запретивый ветром и морю (Мк. 4, 29): да удалит от тебе забвение заповедей, удаливый от запада востоцы (Пс. 102, 12). Да ущедрит душу твою, якоже щедрит отец сыны (Пс. 102, 13). И да просветит сердце твое, просветивый прежде омраченныя (Лк. 1, 79). И да даст тебе терпение, еже пожити со мною возлюбленным тебе с миром, до последняго издыхания, якоже и прежде многа времени явил есть нам благодатию Своею, рекий: «претерпевый до конца той спасен будет» (Мф. 10, 22). И да дарует нам мир со друг другом до конца, егоже даде Своим учеником (Ин. 14, 27). И да даст нам приити в совершенную любовь Его, рекий: «аще любите Мя, заповеди Моя соблюдите» (Ин. 14, 15). И паки рече: «о сем, разумеют вси, яко Мои ученицы есте: аще любовь имате между собою» (Ин. 13, 35). Аще имели быхом таковую любовь, ничтоже бы нас разлучало от друг друга до смерти. Но обаче писано есть: «и ныне Израилю» (Втор. 4, 1) и паки: «аще дух владеющаго взыдет на тя, места твоего не остави» (Еккл. 10, 4). Аз слово Руфи глаголю ти: «да не будет ми разлучитися от тебе: но смерть разлучит между мною и тобою» (Руф. 1, 16–17). Аще ли же ты препоколеблеши что от сих, аз неповинен есмь по всем, ты узриши и отвещаваеши в день он страшный. Ибо аз душу мою сладце полагаю на смерть за тебе брата моего: и несть заповедь: безмолвствуй с надеждою, удивляяся и прославляя Бога, избавльшаго тя от бед великих, и скорбей, и искушений различных. Тому слава, аминь. Прости мя много суесловивша, от многия бо печали, и великия радости, прострох ти слово. Господь с тобою, возлюбленне.

Ответ сей прием, явил есть ему сия:

Владыко Господине, прости мя Господа ради и помолися о мне. О печали же моей и смущении, яко от диавола есть, веси о Владыко! яко издетска веру святых трехсот осминадесяти богоносных отец приях, и никогда-же кроме сего ино учение, и смущаюся. Аще убо веси, о отче, яко безвременно смущаюся: даждь ли слово, ято отвещает господин мой о мне Богови, и не будет ми вреда, и престану от печали и смущения. Люте бо мучуся о сих: невежда бо есмь, и исполнь неразумия, и истязуемь за многи грехи. Да не поречеши убо на мя, Владыко, но воспиши мне прощение: и о сих помози ми благоприятными твоими молитвами: и верую Богови, яко приобрящеши окаянную душу мою.

Ответ 58. Аще бы уразумел еси писанная тебе от мене, то могл бы еси уразумети, яко от самаго мене написах ти сие. Еже бо рещи, душу мою полагаю за тя, означает сие, яко ответствую за любовь твою. Не стыждуся рещи тебе, братови моему, яко не можеши испытовати яже о вере. Не могий же, да не испытуеши: понеже скорбь себе привлекаеши и смущение. Аще бо и с еретики или неверными глаголати или стязатися имать верен, во век не смущается. Имать бо внутрь Иисуса, Начальника мира и тишины. И таковый может мирно стязався, с любовию привести в познание Спасителя нашего Иисуса Христа, еретики и неверныя многи. Прочее брате: понеже превыше тебе есть, еже испытовати о инех вещех, держи царский путь: веру глаголю онех трехсот осминадесяти святых отец, в нюже и крестился еси. Вся бо имать со опасством, разумевающим совершенное. Безмолвствуй убо внимая грехом твоим, и како имаши усрести Бога. И аще тако удержиши мою заповедь, паче же Божию, исповедую, яко отвещаю за тя в день оный, в оньже имать судити Бог тайная человеков. Да не усумнишися убо, и в горшая приведеши себе. Сладкая бо в горька обращает враг, егоже во первых да упразднит от нас Господь Иисус. Да не попечешися от ныне о инех вещех: взят бо попечение от тебе Господь. И видя лукавый бес, яко молитвами святых избавился еси, взыскал есть оставити с тобою от дыма таковаго искушения часть. Помолися о мне брате: да не и мне речет: «научая инаго, себе ли не учиши»? (Рим. 2, 21). Да не преткнешися убо паки в сих, и опечалиши мя возлюбленнаго твоего. Господь да покрыет нас под крилома Своима! Аминь.

59. Другий брат вопроси тогожде великаго старца: како могу уведети помысл, иже от Бога, и иже от естества, и иже от бесов?

Ответ. Чадо Феодоре! прося, уразумей, чесого просиши: и уготови себе к деланию. Писано бо есть: «не высокая мудрствующе, но смиренными ведущеся» (Рим. 12, 16). Вопрошение твое, брате, великия есть меры. Аще убо не очистится око внутреннее многими врачбами, не может отступити от терния и волчцев и объяти грозд укрепляющий сердце и веселящий. Аще не достигнет человек меры сея, разсудити не может, да не когда поруган будет от бесов, и прелстится, веруя им. Преобразуют бо вещи, якоже хотят: а наипаче не ведящим козней их. Возлюбленне, уповай на Господа, и даст ти прошения сердца твоего (Пс. 36, 4). И рцы ему во всех: да будет, Господи, не якоже аз хощу, но якоже Ты (Мк. 14, 36): и сотворит с тобою по воле Своей. Услыши убо, чадо, разсуждение помыслом, о нихже вопросил еси. Аще речет ти помысл сотворити что по воле Божией, и обретаеши радость в вещи, и скорбь сопротивляющуюся, разумей, яко от Бога есть, и понудися претерпети, по глаголющему апостолу: «Умерщвляю тело мое и порабощаю, да не како иным проповедуя, сам неключимь буду» (1 Кор. 9, 27) и исполни хотение Божие. Аще ли же естественный помысл приидет ти, еже хотение естественное, вонми со опасством, и обрящеши разсуждение.

Глаголет бо Божественное Писание: «Сего ради оставит человек отца своего и матерь, и прилепится к жене своей, и будета два в плоть едину» (Быт. 2, 24). Ведый убо апостол, яко воля есть Божия, еже не точию демонская, но и естественная оставити, рече: «яко плоть не ползует ничтоже» (Ин. 6, 63). Прилепляяйся убо к жене плоть есть: прилепляяйся же Господеви дух есть. Хотящим убо духовными быти, отметатися подобает плоти. Еже бо не пользует, то и вредно есть. Вредное же отметно есть. Хотящим же в мире благочестно жити, проповеда, яко «честна женитва» (Евр. 13, 4) и прочая. А иже от бесов помыслы: первее смущени суть и печали исполнени, и сокровенне и тонце в след себе влекут: Одеваютбося во одежды овчи, сиречь влагают помыслы аки правды, суть же внутрьуду волцы хищницы (Рим. 16, 18), рекше, видимыми благими, паче же непотребными, восхищают и прельщают сердца незлобивых. Понеже убо писано есть о змии, яко мудрейший есть, присно блюди его главу (Быт. 3, 1, 15), да не когда той обрящет у тебе язвину, и тою вселение: и прочее соделает опустошение. Аще убо и ты желаеши духовен быти, отложи плотская: ихже бо отрицается кто, сия и отметает. И услыши Самого Господа глаголюща: «аще кто хощет по Мне ити, да отвержется себе, и возмет крест свой и по Мне грядет» (Мф. 16, 24). Како же себе отрицается человек? Точию оставил хотения своя естественная и Тому последовав. Сего бо ради собственне о естественных глаголет, а не о чрезъестественных. Аще бо чрезъестественная оставит кто, от яже суть его ничтоже оставил есть Бога ради. Ниже бо его суть. Оставивый же естественная своя, таковый выну со святым апостолом Петром вопиет: «Се мы оставихом вся, и в след Тебе идохом, что убо будет нам?» (Мф. 19, 27–29) и слышит блаженный оный глас, и о жизни вечныя обетованием изветствуется. Что бо остави Петр, не сый богат, и о чесом хваляшеся, аще не естественная своя хотения? Аще бо не умрет человек плоти, духом живя, востати не может. Якоже убо не пребывают с мертвецем естественная его хотения отнюд, тако ниже со умерщвленым плотию духовне. Аще убо умерл еси плоти, како живут в тебе естественная хотения? Аще ли же неси меры духовныя, но еще младенствуеши умом, смирися учителю, да накажет тя милостию: и кроме совета ничтоже твори, аще и мнится ти добро быти видимое. Свет бо иже от бесов, тма бывает послежде. Еже убо аще слышиши, или помышляеши, или видиши, аще и мало смутится сердце твое, бесовско есть сие. Приими убо написанная ти вкратце: веруя, яко аще потрудишися в сих предуспети, дарует ти, даруяй всем Бог еже быти, выну со святыми его купно служити, радоваться, и купно наследовати благая Его, о Христе Иисусе Господе нашем: Емуже слава, честь, и держава, ныне и присно и во веки веков. Аминь.

60. Старцу ни с кимже сретающуся, разве со своим учеником аввою, тойжде брат, писании срестися с ним моляше, глаголя: яко и авва Моисей, и прочии отцы сретахуся с требующими. Отвеща убо ему старец писменно и с проречением: егоже бытие самым искусом мы познахом. Рече бо: яко имать явитися ему, каким образом, и чесо ради? неверующих ради во Иудеи. По времени бо, томужде брату впадшу во искушение, не верующу и глаголющу: не быти отнюд в келлии старцу, но притворив глаголати авве присутствие его: призвав старец тогожде брата, и обретшихся на месте оном, умы всех ноги, и аз же грешный удостоихся умовения онаго. И тако воспрянув брат оный, и сей ответ воспомянув, исповеда нам свое неверие и проречение старцево. И вси прославихом Бога. Есть же ответ сущ тако:

Брате, никтоже весть яже другаго, точию дух человека живущий в нем (1 Кор. 2, 11). Кийждо весть, что имать в дому своем и что притяжа во влагалище, и потому раздает и на препитание инех. И повеление имамы Владыки, не здати столпа, аще не первое разчтем имения (Лк. 14, 28). Изчислил еси мне святых богатых бывших по духу, и возвеселил мя еси в разуме твоем: аще бы паче и в делех! Испытую же тех, и обретаю, яко по превосхождению добрых их деяний, толико есмь и аз во злых моих деяниях. И онии убо дерзающе творяху: аз же, и не творя, трепещу ведая содеянная мною, глаголющаго ради: «научая инаго, себе ли не учиши»? (Рим. 2, 21). Понуждаюся же послушати поносящаго ми и глаголюща: «лицемере, изми первее бервно из очесе твоего» (Мф. 7, 5) и прочая. Труждаюся же изъяти, и не могу. Не отчаяваюся же, но надеюся получити. Рцы ми, брате: аще кто речет некоему нищу, яко человецы нецыи много дадоша, даждь и ты ничтоже имый: еда может сие сотворити? Что же к сему? Яко мнози жаждуще, и обретающе удоволствие воды, не любопытствуют о источнице, или о дожде, или реце, откуду текут: и мнози наслаждаются светлости солнца, и не любопытствуют, долго ли есть, или кратко, или нечувственно, или чувственно. И о инех стихиях такожде. И о Бозе написаша отцы, вопрошени бывше, яко ищи Господа, и не испытуй, где живет. Что же реку к тебе, оставлшему взыскуемое от тебе тщание о твоих согрешениих и желающу мя видети, червя смердяща, землю и пепел? Обаче и аз, безумен сый, радуяся послах ти ответ, заблуждаяй и мняй быти нечто: и забвению предах писанное, яко «мняй себе быти что, ничтоже сый, лстит себе» (Гал. 6, 3). Ей, прелстихся в сем, и глаголах, не сый достоин. Ты обаче, яко добр делатель и послушлив, делай, и да не взыщеши сего от мене, желающа видети и целовати тебе и всех, от яже по Богу любве. И аз же, аще известит ми Бог, от себе припаду, и облобыжу пяты ваши всех, моления ради и молитвы, еже избавитися от неверующих во Иудеи (Рим. 15, 31). Да не в парении, брате, иждиваем дни своя, но да стяжем плач, исполненный слез, да блаженство улучим (Мф. 5, 4). И поучимся в нищих и кротких, да снаследницы будем онех. И поженем мир со всеми, да обрящемся с сынми Божиими и претерпим поношение и укоризну, да умножится мзда наша на небесех. И потщимся с делы благими явитися Ему, яко да видят человецы добрая наша дела и прославят Отца нашего Иже на небесех (Мф. 5, 16). Не яко исправив, написах ти сия, ибо должника себе во многих долгах вижу: но непрестанно припадаю, моляся Богови, еже даровати мне же и тебе оставление грехов, молитвами святых. Аминь.