Текст книги "Аскетика. Том I"

Вопрос 251, тогожде к томужде великому старцу. Рцы ми, отче, како приходит кто во еже отсещи волю свою и во оное: се мы оставихом вся и вслед Тебе идохом? Яко удержах малое село, на препитание мое, зане немощен есмь.

Ответ великаго старца. Еже оставити волю свою, кровопролитие есть: то есть, еже достигнути кому потрудитися до смерти, и отвергнути волю свою. Оно же: «се мы оставихом вся, и в след Тебе идохом» (Мф. 19, 27) о совершенстве есть: а не о селах и имениих малых; но и о помыслех и волях. Ты же еще не пришел еси в сие совершенство, но егда приближишися услышиши, еже сотвориши. Прочее едино, сиречь, буди без попечения от всех вещей и попечений. Село же оно имей еще на препитание твое. Господь Иисус Христос да приведет тя в радость ону неизглаголанную: Той бо есть свет вечен. Аминь.

252. Вопроси тойжде тогожде великаго старца: понеже зело боримь есмь от блуда, и бедствую во отчаяние приити, и ниже воздержатися могу за немощь тела моего, помолися о мне, Господа ради, и рцы ми, что сотворю?

Ответ. Брате, завидя тебе диавол, воздвиже на тя брань. Сохрани убо твоя очеса, и не питайся в сытость. Вина же мало причащайся, немощи ради, юже глаголеши. Стяжи же смирение, яко тем расторгаются вся сети вражия. И аз же худейший сотворю мою силу, моля Бога, да покрыет тя от всякаго искушения и сохранит тя от всякаго зла. Да не уступиши, брате: ниже в отчаяние да ввержеши себе: се бо есть велия радость диаволу. Непрестанно же моляся, глаголи: Господи Иисусе Христе, спаси от страстей безчестия, и обрящеши милость Божию, и тако приимеши силу молитвами святых. Аминь.

253. Тойжде брат, борим тоюжде страстию блуда, проси тогожде великаго старца помолитися о нем и рещи ему, како познавает кто от своея ли похоти искушаемь бывает или от врага?

Ответ. Брате, без труда и сокрушения сердечнаго никтоже может избегнути страстей и угодити Богови. Егда убо искушается кто от своея похоти, се есть: еже нерадети о себе и оставити сердце размышляти содеянная им исперва: и тогда от самаго себе наводит на себе гнев от своея похоти: и помалу ослепляем ум, начинает в неведении внимати, или глаголати, к немуже имать похоть, и причины сам себе приносит, како побеседует к нему, или и сядет с ним, и всяким путем ходит исполнити свое похотение. Еже убо попустити помысл в сия, умножает брань к падению. Аще и не телом, но духом в сложениих. И обретается человек той вжигаяй огнь себе в веществе. Трезвенный же и разумный человек, хотяй спастися, видя, откуду вредится, хранит себе с опасством, от воспоминания лукава, от еже не размышляти в тех самых страстех, и от видения и беседы, и коея-либо вины: бояся, да не возжжет себе сам огня. Се брань от своея похоти, или произволения, бываемая. От диавола же бываемая, сия есть. Страшится втайне сердце хотящаго спастися, еже не прияти семене. И зде же паки с трезвостию хранит себе, и от воспоминания злаго, еже не глумитися со страстьми, и от видения, и беседы, и вины. Аще ли же нужда есть либо дела к таковому, то лучше презрети дело то, и душа да не погибает. Трезвися, брате, смертен еси и не многолетен, да не восхощеши за малое время погубити жизнь вечную. Кую пользу имать зловоние и нечистота греха? Разве стыд, поношение и соблазн: воздержание же победу имать и венец, и похвалу. Укроти коня своего уздою ведения, да не внимая семо и овамо, женонеистовствует паче же муженеистовствует и вержет тя долу всадника своего. Помолися Богу, да отвратит очи твои, еже не видети суеты. И стяжавшу ти мужественное сердце, бежат брани от тебе. Буди тверд, якоже вино язве, и не попусти себе собирати зловоние и нечистоту. Стяжи же плач, да отчуждит тя от дерзновения, погубляющаго души стяжавших е. Да не повержеши долу орудия, егоже кроме не бывает возделаема плодоносная земля: орудие же есть смирение, соделанное от великаго Бога: имже искореняются вся плевелы от села Владыки, и еже подает благодать живущим на нем. Не падает смирение, но от падения воздвизает имущия е. Возлюби всем сердцем плачь: сопричастник бо есть добраго сего делания. Потрудися отсещи волю твою во всех: сие бо в жертву вменяется человекови. И се есть, оно: «Тебе ради умерщвляемся весь день, вменихомся, яко овцы заколения» (Пс. 43, 23). Да не ослабиши себе беседами, зане не оставляют тя успети по Богу. Зельным насильством наказуй своя чувствила: зрение, слышание, обоняние, вкус, осязание: и преуспееши благодатию Христовою. Без мучений бо мученик не бывает: яко же и Господь рече: «в терпении вашем стяжите души ваши» (Лк. 21, 19). И апостол глаголет: «в терпении мнозе, в скорбех» (2 Кор. 6, 4) и прочая. Блюди, да не покажеши халдеем сокровища дому твоего, зане пленника тя поймут в Вавилон, к Навохудоносору царю Вавилонскому. Попери страсти поучаяся во ответе сем всегда, да не попран будеши от них, и озлобят тя оныя силою. Бегай от них, аки серна от тенет: да не заколют тя, яко ягня. Да не убоишися же их, не имут бо силы: Господь наш Иисус Христос разслаби я, и безсильны сотвори. Да не уснеши же, аще бо и полумертвы суть, но не спят. И да не вознерадиши: не бо онии нерадят. Даждь мало руку твоим отцем, хотящим тя исторгнути от тимения зловоннаго. Поминай, «яко много может молитва праведнаго поспешествуема» (Иак. 5, 16). Да не судиши кого, ни да уничижиши, или соблазниши кого. Не приписуй кому тех, яже не веси известно в ком: сие бо погибель есть души. Себе внимай и ожидай грядущия смерти. Рцы себе слово блаженнаго Арсения: Арсение, чесо ради изшел еси? Научися, чесого пришел еси зде искати. Ко Иисусу тецы, да постигнеши Его. Аще спастися хощеши, скоро тецы, да обрящешися во благой сей дружине святых старцев. Аще хощеши преуспети, делай. Поревнуй быти со святыми, прославляемь в неизглаголанней славе, а не со студными бесы в неизглаголанней муце. Вожделей быти во Царствии Небеснем, а не в геенне огненней. Вожделей услышати: «Приидите благословеннии Отца Моего» (Мф. 25, 34). И: «добре, рабе благий и верный» (ст. 23) и прочая, а не услышати: «иди от Мене прокляте» (ст. 41), «рабе лукавый и ленивый» (ст. 26). Господня слава вовеки. Аминь.

Вопрос 254, тогожде к томужде великому старцу. Понеже многи грехи имея, хощу покаятися, и за немощь телесную не могу удержати постничества отцев: молю, да речеши ми: како должен есмь положити начало? Повели убо и изъясни ми, что есть, еже назнаменовал еси мне в ином ответе, оно: да не покажеши вавилоняном сокровища дому твоего, зане поймут тя в Вавилон пленника?

Ответ Варсануфия. Брате, суть нецыи нищии, яже Господь ублажает, понеже отвергоша вся стяжания своя, сиесть вся страсти, и обножиша себе от них имене Его ради: сии воистинну суть нищи, и имут блаженство оно. И суть ини нищии, ничтоже благо стяжавшии, имже грозит, глаголя: «отыдите от Мене проклятии» (Мф. 25, 41). Имеяй убо таковая стяжания, и в сих отягощаемый, отвергает я и без попечения бывает. Темже убо, аще хощеши положити начало покаяния, уразумей, что сотвори блудница: слезами своими омы нозе Владыки. Плач омывает всякаго от грехов его: трудом же приходит кому, чрез многое поучение и терпение и помышление о Страшном суде, и стыде вечном, и чрез отречение себе, якоже рече Господь: «хотяй бо, глаголет, по Мне ити, да отвержется себе, и возмет крест свой, и по Мне грядет» (Мф. 16, 24). А еже отвергнутися себе и крест взяти, есть еже отсещи во всех волю и еже имети невменяемость. И понеже рекл еси, яко немощное имаши тело и не можеши ничесоже сотворити, по силе твоей твори, без мала приемля пищу хлеба, и пития такожде. Ибо Бог приял есть две оныя лепты вдовицы, и порадовася паче, неже о всех прочиих. Бездерзновенности обучися, и спасешися. Сохрани первыя ответы, и сей, аки зеницу ока. Оно же: да не покажеши сокровища твоя вавилоняном, бесом рех, внегда глаголати тебе человеком, яко мне речен бысть ответ оный. Смотрят бо бесове, и преогорчеваются на тя. И тебе убо борют в тщеславие: слышателей же простейших в соблазн: и ты понесеши осуждение обою. Могущим же слышати и сохранити, радость есть и польза. Всякое же дело благо, еже твориши, потщися утаевати е: сие бо полезно ти есть. Господь да вразумит тя молитвами святых. Аминь.

Вопрос 255, тогожде к томужде великому старцу. Помолися о мне, отче, яко зело стужение имею от помысла блуда, уныния и боязни: глаголет ми помысл, да егда вижу брата, на негоже имам брань, беседую с ним: да не како от еже не беседовати ми с ним, в подозрение сие приимет. Ощущаю же, яко аки давят мя бесове, и боюся зело от сего.

Ответ. Брате, понеже неси обучен во вражиих бранех, приподаются тебе помыслы боязни, уныния и блуда. Стани убо противу им твердым сердцем. Ибо страдальцы, аще не подвизаются, не венчаются. И воини, аще не покажут искуса во бранех цареви своему, почестей не сподобляются. Яков бе Давид. Не поеши ли ты: «искуси мя, Господи, и испытай мя: раззжи утробы моя и сердце мое» (Пс. 25, 2). И паки: «аще ополчится на мя полк, не убоится сердце мое. Аще востанет на мя брань, на него аз уповаю» (Пс. 26, 3). И о боязни: «аще бо и пойду по среде сени смертныя, не убоюся зла, яко Ты со мною еси» (Пс. 22, 4). О унынии же: «аще дух владеющаго взыдет на тя, места твоего не остави» (Еккл. 10, 4). Не хощеши ли искусен быти? Но муж не искушаем не искусен. Брани творят человека искусна быти. Сие есть делание инока, еже претерпевати брани, и противитися с мужеством сердца. А понеже не веси хитростей их, приподает ти помыслы боязни и разслабляет твое сердце. Уразумети же должен еси, яко не попустит Бог на тя брани и искушения вящше силы твоея. И научает тя апостол, глаголя: «верен Бог, Иже не оставит вас искуситися паче, еже можете» (1 Кор. 10, 13). Многократно и аз, брате, в юности моей искушаем бывах зело от беса блуднаго: и труждахся подвизаяся на помыслы, и пререкая, и сим неслагаяся, но предлагая вечныя муки пред очима моима. И тако на всяк день творяща чрез пять лет облегчи мя Бог от них. Вещь же сию упраздняет молитва непрестанная с плачем. А еже давити тя, от зависти творят бесове. И аще бы возможно было им, то и от келлии твоея тя отгнали быша, но не попущает им Бог, да возобладают над тобою. Ниже бо имут власти. Можаше бо Бог облегчити тя вскоре, но не стоял бы еси и противу другия страсти. Ты убо да не разслабишися от бесов, еже внимати ему или беседовати с ним. Но аще что и случится не хотящу срестися с ним, востягни зрение свое от него со страхом и благопристойностию, и да не разрешиши слуха твоего ко гласу его. Аще ли же и тойжде брат сам о себе по неведению возглаголет ти или сядет близ тебе, то с художеством отступи честно, не отскакивая. И рцы помыслу твоему: помяни суд Божий страшный оный и студ творящих безместная сия. И понуди свой помысл, и обрящеши помощь молитвами святых, и помилует тя Бог. Не дитя буди умом, но злобою младенствуй: умом же совершен буди брате. Внимай себе, како имаши срести Бога. Аминь.

256. Тойжде моли тогожде великаго старца, глаголя: помолися о мне, отче, яко окаянен есмь по всему, и нужду имам многаго человеколюбия. И помыслы во мне сеются глаголюще: отыди в землю чуждую, и тамо спасешися. И да Бог молитвами вашими не оставит их пообладати мною.

Ответ. Брате, проклят есть, насеявый на сердце твоем таковыя помыслы, ради преступания заповедей, еже от места сего отыти: иже есть диавол. Оправданием бо делает тебе сия: да обругав, сотворит тя соблазн многим, якоже понести сих осуждение. Сия же страждеши от нерадения и тщеславия. Се глаголеши: аще на чуждую страну отыду, то понесу безчестие. И како, точию услышавшу ти, яко рече брат твой на тя слово, смущается сердце твое, и не хощеши да кто увесть, яко согрешил еси? Но с нерадением и тщеславием действуют беси, еже истребим душу твою. Известен буди о Господе, яко аще не бы рука Божия была и молитвы сущих зде истинных рабов Божиих, пребыти в монастыре лета всецелаго не могл бы еси. Но аки слеп не видящ; тако не видиши благодеяния Божия, еже сотворил есть тебе, и творит молитвами святых и блаженнаго Аврамия, рекшаго ти и брату твоему: яко аще пребудете на месте сем, имате мене ходатая. Брате, внимай себе опасно и подвизайся с помыслами, еже не вознерадети, ниже тщеславитися, ниже волю свою составити в чем, и еже не прияти сеемых помыслов со оправдании, зане в падение падаеши велико. Известно же веждь яко идеже аще пойдеши от конец земли до конец ея, неспользуешися равно здешним. И яко же котва кораблю, тако будет ти молитва здешних отец. Стяжи крепость, и отже-нет от тебе дерзновение, приносящее вся злая в человецех. И безпечален буди от всякия вещи, и тогда упразднишися Богу. И умри от всякаго человека, и се есть странствие. И держи невменяемость, и обрящеши помысл твой несмущен. И не имей себе нечто сотворша благо, и сохранится тебе цела мзда. И над всеми сими, помяни яко не умедлиши в телеси. И потщися рещи со дерзновением в час оный: «уготовихся и не смутихся» (Пс. 118, 60). Брате, без труда не можно жити, и без подвига никтоже венчается. Понудися спастися подвизаяся, и поможет ти Бог, хотяй всем человеком спастися и в разум истины приити. Той да помилует тя, чадо, еже с долготерпением приступити к деланию Его. Яко Того есть милость, и сила, и слава, во веки веков. Аминь.

Вопрос 257, тогожде к томужде великому старцу. Отче, что есть, еже рекл ми еси, яко не бы могл еси, ни лето едино пребыти в монастыре? И помолися о мне Господа ради. Яко егда сплю, нападает на мя демон давя мя: и требую человеколюбия от тебе.

Ответ. Яко рех ти, аще не быша были молитвы отец, не бы сотворил еси ни лето едино в монастыре, о иноцех рех ти. Не бо вси иже в монастырех, суть иноцы, но творяй дело иноческо. Глаголет бо: «яко, не всяк глаголяй Ми: Господи, Господи, внидет в Царствие Небесное, но творяй волю Отца Моего, иже на Небесех» (Мф 7, 21). Что бываеши поругаемь, брате, бедствуя? Вопрошаеши бо, и не усердствуеши; но и паки вопрошая, инем глаголеши тщеславяся, человекоугождая: и возбраняеши себе преуспети вскоре. И сего ради искушаемь бываеши во сне, и нападает на тя давя тя бес. И попущает Бог, да накажешися, яко да укориши себе, якоже инок, и не разумееши, брате. Время наше есть, испытовати страсти наша, и еже плакати и рыдати. И егда убо седиши в келлии твоей паря, укори себе во всех брате: и поверзи немощь твою пред Богом, и поможет и укрепит тя, да преуспееши в Нем. Аминь.

Вопрос 258, тогожде, и прошение молитвы к иному старцу. Господа ради, помолися о мне, да избавлюся от страстей безчестия и тщеславия. Яко оскверняют мя во всяком деле, еже мню добро творити. И сие же молю рещи мне, каковым намерением должен кто творити поминания святых? И како кто изблевает злобу юже имать.

Ответ Иоанна. Аще избавится хощеши от страстей безчестных, отсецы от себе дерзновение еже ко всякому человеку, наипаче к нимже видиши сердце твое преклоняющеся по страсти похотной: и сим свободишися и от тщеславия. Тщеславие бо, спричастно есть человекоугодию; человекоугодие же, спричастно есть дерзновению; дерзновение же есть матерь всех страстей. Творяй же памяти святых без тщеславия, помышляя, яко от Бога творит, а не от своих, сопричастник тем бывает, и мзду приемлет от Владыки их. Попечение же о спасении души, и любы к Богу, творит всякаго изблевати юже имать злобу и чисто покаятися. Слыши, чадо, и от видимых поразумей невидимая. Егда мало что болиши телом; воздерживаешися от вредящих тя вещей, а душею твоею болезнуя, не подвизаешися ли воздержатися? Труда и пота потреба многа, яко же апостол глаголет: умерщвляю тело мое и поробощаю. Сотвори свою силу, и Бог молитвами отец твоих способствует ти: жаждет бо спасение наше видети, кляныйся Собою, «яко не хощет смерти грешника, но еже обратитися и живу быти ему» (Иез. 33, 11). Многа сила восходит из места сего от молитв истинных рабов Божиих о всех нас, ихже, верую, яко не посрамит Господь. Сопривнеси к тем и твои две лепты; и радость сотвориши Ему, якоже вдовица оная. И привяжи твою обремененную ладию кораблю отец твоих, и управят тя ко Иисусу, могущему ти смирение даровати, и силу, и разум, и венец и радование. Аминь.

Вопрос 259, тогожде к великому старцу. Понеже юнейший есмь и несмыслен и имею служение паче мене, молю, отче, да испросиши ми у Бога разум, еже мощи ми даяти вещь по требованию ея, и слово рещи во время, и примолчати: и в нихже сумнюся, да призываю Бога и твоя молитвы, и предстанут ми, и да не заблуждаю.

Ответ Варсануфия. Радость есть велия, еже просити кому вещи по страху Божию: таковый смело да надеется, яко будет его прошение. Но слыши, брате, аще семене просиши селу своему, удобри е к приятию семене онаго. О добрейшей бо и возделоваемой земли речеся, яко сотвори во сто. Еже не возбранити силу мою сотворити, якоже могу, не возбраню заповеди ради Божия, но исповедую немощь мою, яко не могу ти даровати сего, недостоин бо есмь. Но аще ты веруеши, по вере твоей приимеши, не точию сие, но и елико требуеши. Весть бо Бог, ихже требуеши, прежде прошения твоего. Не усумнися убо, и верую, яко сотворит Бог, не мене ради, по веры ради твоея. Прежде всего, смирися пред Богом. Смиренным бо дает благодать, о Христе Иисусе Господи нашем: Емуже слава вовеки. Аминь.

260. Тойжде вопрошаше инаго старца, яко, како употреблю силу ответа сего старца?

Ответ. Аще како ти подобает употребити силу ответа сего старца, хощеши научится, то тако есть: егда хощеши беседовати, или вещь сотворити, поминай имя старца, и Бог насеет в сердце твоем, что сотворити подобает или како возглаголати. Но со смирением, да не погубиши благодати сея.

Вопрос 261, тогожде к великому старцу. Понеже сотворил еси милость, отче, со мною немощным, и дал ми еси, да в нихже аще глаголю или дею, призываю имя Божие и молитвы твоя, и успеваю: и по воли Его творити или глаголати понуждаюся: случается же, егда от нерадения моего и забываю: то молю, да испросиши ми у Бога трезвение, и да не оставиши мя заблуждати по воли моей. Еще же молю, аще призвав в коей-либо вещи Бога и молитвы твоя, еще пребываю сумняся сотворитили, или не сотворити, да речеши ми, како должен есмь совершити. И паки: аще случится вопрошену быти ми о вещи, и прежде даже или призову Бога, или воспомяну, что рещи, вопросивый абие ищет ответа, тако нечаянно вопрошаемь, что сотворю? И о очесех прошу помолитися, да возобладаю ими; яко вельми растицаются?

Ответ. Аще приимет кто заповедь, или совет, или ответ отец о вещи, и от забвения, или нерадения забудет; познав, яко согрешил есть, да покается и простит ему Бог. Почто же написал еси, брате, о трезвении едином? Аз о всяком даянии блазе молюся, да дарует ти Бог, и да пребудет с тобою вовеки. Аще случится ти вещь творити, призвавшу Бога и молитвы святых, и усумневаешися еще, сотвори ю: воля бо Божия есть, зане прежде призвал еси Его. И о еже нечаянно вопрошаему отвещавати, ничтоже скорее ума, поели и ко Богу, и даст ти, что отвещати безмятежно. Смирение хранит от растицания очи и всего человека от всякаго зла. И еще великих дарований, яже рех ти, прошу тебе. Но обаче аще и ты твориши силу твою, внемли себе. И не точию святии, но и Сам Бог даст тебе руку и сотворит милость Свою с тобою.

262. Прошение тогожде к томужде великому старцу. Молю тя, отче благоутробнейше, яко видиши слепоту души моея. Паки молю тя, испроси ми просвещение в сердце моем, еже мощи ми разсуждати правый помысл от сокровеннаго стропотнаго. Яко боюся поверити ему. Вем бо многажды, яко не вижду еже бы вещь по страсти дати кому: и искушах помысл, аще приятно ему есть, еже дати вещь чрез инаго, и не уведену быти, яко аз дах ему, и не приятно бяше. Случается же паки, яко, по страсти убо не мню начати сие творити или глаголати: но между тем, егда даю, или глаголю, соуслаждается помысл мой: что убо сотворю окаянный? И иным же образом оскорбляет мя действие сие, паче же сердце мое словолюбивое. Случается бо, егда глаголют ми нецыи о вещи: и прежде неже тое окончат, слагается им и соуслаждается, аки знателен, помысл мой. Молю тя, отче, испроси мне силу еже молчати: удивляюся бо, како весть сердце мое, яко ничтоже суть сия, но и тща творят человека от всякаго блага, и соуслаждается тем.

Ответ Варсануфия. Без болезни сердечныя не приходит кому разсуждати помыслы. Аз убо молю Бога дати тебе сие. Да возболит же и твое сердце мало, и даст ти Бог. И о всех сих подобно есть. Егда дарует ти Бог дарование сие, присно разсуждати имаши Духом Его, молитвами святых, и болезнию сердца твоего помыслы едины от других. Егда же видиши вещь приносящу тебе знание, молчи: якоже и от сына моего истиннаго по Богу слышал еси, егоже должен еси слушати о всяком помысле твоем. Не от себе бо глаголет ти: но аще что дарует ему Бог, на пользу коегождо. Бог да покрыет тя и даст ти силу, еже молчати в разуме во всех: и благодать еже познавати оно, когда потреба ти есть глаголати без страсти. Не бо весть совершенно сердце твое, яко сквернят человека: зане, не имел бы еси оставити, еже усладитися тебе сими.

Вопрос 263, тогожде к томужде великому старцу. Утробы щедрот, яже имаши на мне грешнем, творят мя паки безстудствовати и стужати тебя. Просвети мя убо, како имать трудитися сердце мое о еже приити в не разсуждению. И о непрестанной памяти, аще удостоиши мя сего поучения, назнаменай ми, господине мой, и укрепи мя в нем: зане боится помысл мой, яко не возмогу сего удержати: сего ради молю, аще полезна ми есть отнюд вещь сия, яви ми, владыко. Верую бо, яко егда исходит слово из уст твоих, творит в сердце моем силу.

Ответ Варсануфия. Еже трудитися сердцу твоему есть, еже молитися Богу выну, да не оставит тебе блуждати, или ходити по своим си хотениям. И от сего, приидеши в разсуждение. О непрестанной же памяти, сиречь, поучении, положи начало, и не убойся: и укрепит и утвердит тя Бог. Но на уповании сей, да пожнеши не ослабевая. Благословен Бог, благословляяй тя положити начало: Иже и силу приподаст ти, еже удержати по мере твоей.

Вопрос 264, тогожде к томужде. Понеже иногда и мне многажды прихождаше малая теплота на немногия дни, и паки отхождаше: и ныне же аки един час храню со усердием память ону, а другий с нуждею. И устрашает мя помысл, да не якоже и прежде, пребудет точию на немногие дни, и паки оставит мя малая сия теплота, и совершенно погублю душу мою. Темже молю тя, отче благий, да не оставиши мя, но скажи ми, что есть прогоняющее память сию и теплоту. Испроси же мне и хранение чувств: яко много теми пленяюся: и наипаче, егда сердце мое вины хощет. Сие бо само о себе вне намерения точит памяти страстны, или безумны, или помыслы не во время их. Сего ради молю тя, сильне о Господе Отче, даруй ми рабу твоему трезвение, да разумею входящия в не, и како должен есмь трудитися с ними, да не удалят мя от твоего благословения. Еще же и сие яви мне: аще сотворю вещь, или реку, и покровен буду от греха в ней, являемей ми от Бога: еда должен есмь по избытии благодарити Богу? И приводит ли сие в любовь Божию? Или отнюд не принимати, яко избегох греха, но паче испытовати погрешения в бывшем деле или словесех и тако просити прощения о сем.

Ответ Варсануфия. Потрудися в болезни сердца стяжати, и Бог даст ти я выну, теплоту глаголю и молитву. Забвение бо прогонит я: сие же от нерадения раждается. О хранении же чувств: всякое дарование с болезнию сердца дается. Дарование же трезвения не оставляет, да внидут помыслы: аще ли же и внидут, то не оставляет их повредити. Бог да даст ти еже трезвитися и бодрствовати. Заповедь бо есть, оно, «о всем благодарите» (1 Сол.

5, 18) наипаче же о сем, еже явил еси мне. А еже испытовати погрешения и просити прощения, зело полезно есть.

265. Прошение тогожде к томужде великому старцу. Молю тя, отче святый, испроси ми силу от Бога, яко еже завещаваю себе един, то сходяся с братиею отвергаю: и боюся, да не како обыкну согрешая раскаеватися точию, а не исправлятися, и тако пребуду во гресех моих, и умру. Вем бо, яко пользуют ми скорби страстей, яко негли сокрушат жестокость души моея. И да не будет ми безумному желати ныне покоя от них. Но сего, отче, прошу чрез ходатайства ваша. Аще полезно ми есть, да не часто побеждаюся, и да не имать скорби сердце мое о сем.

Ответ. Никтоже глаголет кому: аз ношу твое попечение, а ты буди безпечален: понеже преступник обрящется. Но должен есть и носимый совнести малое тщание и творити силу свою, трезвенно сохраняя заповеди отец своих. Аще же и падет единою, да востанет паки. И верую Богови, яко аще и совосхитится единою, то потщится паки: яко ниже обычай ему будет, ниже нерадение. Но Бог вскоре приведет и в чин тщаливых и не приимет душу его, дондеже приведет и в меру высоку, в мужа совершенна. Да не ослабееши убо, но, яко же предлежит ти время, делай, смиряйся, буди послушен, повинуйся, и поможет ти Бог, смиренным даяй благодать, гордым же противляяйся. Безпрерывно глаголи: «Иисусе, помози ми», и поможет ти. Бог да свободит твою душу от страстей безчестия, чадо.

Вопрос 266, тогожде к томужде великому старцу. Кланяюся ти, отче милосерде, и врачу немоществующия моея души. Увы мне! И что показал ми еси, и почто привлек мя еси? И где есмь, аки связан злаго ради моего обычая. И аще отрешуся мало, паки возвращаюся за еже даяти и взимати. И аще бы не сие, яко стыждуся благости Божия и твоего милосердия (яко вем, от киих трудов приведе мя под ноги ваша), во отчаяние могл бых приити. Егда бо покрываемь бываю молитвами вашими, прехожду с миром. Егда же обнажуся мало, да покажется произволение мое, абие побеждаюся. Егда сежу в келлии от утра, постизает прочее ответ, и исхожду. И по еже сотворити и, ктому не обретаю возвратитися паки: но сшивает ми изветы на изветы, могущия и кроме мене быти, дондеже уязвит мя, и тако прихожду позде в келлию мою с неприятностию многою, и омрачением, и унынием, не ведая, что сотворю. Сего ради, отче святый, се пред сердцем твоим есмь видящим вся: сотвори со мною по милосердию твоему, и якоже хощеши, и якоже веси. Аз бо о тебе, не вем что реку: но прости ми Бога ради.

Ответ. Брате, не леть есть от сих отчаяти себе. Ниже бо кормчий биему кораблю от волн, отчаявает свое спасение: но паче управляет, дондеже приведет корабль в пристанище. Тако и ты, обретая, яко пленился еси, и разлился еси в вещи, воззови себе в начало пути, глаголя со пророком: «И рех, ныне начах» и прочая. Искуси вещи, братиею ли могут быти, или тобою: и се не отступил еси от пути. Ибо по Бозе попечение, делание есть духовно, творимое и совершаемое во спасение души, и сотвори по силе своей, да не подлыя вещи изведут тя от келлии твоея. То бо есть бесовская хитрость. Внимай себе разумно, и поможет ти Бог, молитвами святых, аминь.

267. Тогожде прошение к томужде великому старцу, еже понести грехи его.

Ответ. Брате, аще и паче мене просиши мя о вещи, обаче покажу ти меру любве, яко нудит себе и во яже паче меры. Се удивихся твоему лицу, и восприемлю и ношу, но на определении сем, да и ты носиши еже сохранити моя словеса и заповеди моя: суть бо спасительны, и поживеши непостыдно.

Вопрос 268, тогожде к томужде великому старцу. О заповедех, яже рече, и прошение о еже возмощи сохранити тыя.

Ответ. Укрепивый отцы наша, да укрепит и любовь твою, брате, и даст ти разум духовен, еже разумевати во всех делех твоих. Ты убо сохрани от празднословия язык твой, и от сласти чрево, а ближняго от раздражения. Бездерзновенность, невменяемость, любовь со всеми и еже всегда имети Бога во уме, поминая, «когда явлюся лицу Божию» (Пс. 41, 3). Сия имей в себе, и сотворит земля твоя во сто плоды Богови, Ему же слава вовеки. Аминь.

Вопрос 269, тогожде к томужде великому старцу. Что есть, отче, невменяемость?

Ответ. Брате, невменяемость есть, еже неравняти себе кому: и еже не рещи о деле добре, яко и аз сие сотворих.

270. Прошение тогожде к томужде: о преступлениих положенных ему заповедей: и о споспешестве в покаянии, и како подобает каятися. И аще случится преступление, разоряется ли завет?

Ответ. О имени Божии, по прошению твоему, будет ти, якоже просил еси. Прочее, сохрани еже не высокомудрствовати, да не погубиши вся. И егда преступиши заповедь, тецы в покаяние: и да не аки имея обязание ране, вознерадиши, да не паки в горшая приидеши. Имущу ти руку со мною, стоит твердо бывший к тебе от мене завет. Аще ли же ни, како Бог помилует тя, еже слышати и сохранити о Христе. Аминь.

271. Тогожде к томужде великому старцу прошение молитвы, еже не отлучитися от покровительства его, ниже в будущем веце.

Ответ. Аще бы разумел еси чадо реченная к тебе от мене, познати могл бы еси, яко обручение тебе дах во спасение души твоея. И да не будет ми прелстити, ниже разлучити тя от спасающихся истинных чад моих, и Божия покрова. Но и ты потщися не отлучитися от таковыя жизни. Апостол бо не отлучил есть никогоже, но рече: «аще ли неверный отлучается, да разлучится» (1 Кор. 7, 15). Не буди же да и на тебе исполнится сие: но речено ти есть ко утверждению еже внимати себе тщащуся не отпасти от чаяния сего и надежды. Возмогай убо о Господе, рекшем Своим учеником, яко приимут силу с высоты.

Вопрос 272, тогожде к иному старцу. Аще кто помышляет себе под всею тварию, не согласует же тому и деяние, что убо есть?

Ответ. Елико не обретаеши деяние согласно совести, ниже оное истинно есть, но поругание бесов.

Вопрос 273, тогожде к томужде. Не яко, отче, имею себе, яко есмь под всею тварию, но яко, егда испытую совесть, обретаю себе повинна, яко должен есмь быти под всею тварию: еда убо и сие поругание бесов есть?

Ответ. Ныне, брате, мало начал еси право ступати. Се бо есть самая истина. Бог же да приведет тя в меру оную, еже имети себе под всею тварию. Здравствуй о Господе.

Вопрос 274, тогожде к томужде. Кий путь наипаче спасает? Трудами ли или смирением? Рцы ми, Владыко, и о забвении.

Ответ. Труд истинный, брате, несть кроме смирения, ибо сам о себе труд всуе есть, и ни во чтоже вменяется. Глаголет бо: «Виждь смирение мое, и труд мой, и остави вся грехи моя» (Пс. 24, 18). Имеяй убо сия, скоро постизает. И имеяй смирение со уничижением, и той такожде постизает: уничижение бо место содержит труда. Имеяй же смирение само о себе, входит убо, коснее же обаче. Аще же кто восхощет удержати истинное смирение, да не счисляет себе, ни в коей же вещи отнюд. Сие бо есть истинное смирение. Приемляй огнь, егоже прииде Господь воврещи на землю, забвения и пленения не приемлет, имея всегда чувство огня. От чувственнаго же огня приими притчу. Аще бо обрящется человек умрети хотяй; и приближится ему огнь, абие ощущает болезнь. И в кую-либо вещь аще пленится человек, нападет же нань угль огня, абие ощущает, и ниже мало пребывает в пленении. Огнь, брате, не угасает: зане ниже огнь есть прочее. Аще убо изменитися хощеши забвения и пленения, инако не можеши, аще не стяжеши в себе духовнаго огня. От теплоты бо его она погибают. Стяжавает же кто огнь сей, ко Богу желанием. Брате, аще не во еже всех возболит сердце твое нощию и днию взыскати Господа, предуспети не можеши. Аще бо упраздняешися в сих, приидеши в сия; глаголет бо: «упразднился, и разумейте» (Пс. 45, 11) и прочая, да даст ти Господь разумети сия и потрудитися в них.