Текст книги "Аскетика. Том I"

Вопрос 782. Ин христолюбец вопроси тогожде старца, глаголя: аще жидовин, или язычник, позовет мя в праздник свой на обед, или и подарки пришлет мне, прииму ли, или ни?

Ответ. Да не приимеши. Вне бо правил есть Церкве святыя, и ходити не подобает.

Вопрос 783. Что убо, яко велик есть человек той, и друг мой, и скорбит, аще не прииму, и что реку ему?

Ответ. Рцы ему: весть любы твоя, яко вся повеленная от Самаго Бога, подобает боящимся Его хранити. И от нихже творите, можно известну быти. Ибо и ты любве ради твоея ко мне, никогда же потерпиши преступити заповедь предания твоего: и не помышляю от сего, яко презриши любовь твою ко мне. И мы убо предание имамы от Бога чрез святых отец наших и учителей, никакоже причащатися чесого на празднике иноязычников. Убо сим не оскорбляю любовь должную к тебе.

Вопрос 784. Понеже суть нецыи от иноверных торговии, и продают в праздники своя купуемая, не безместно ли есть от них куповати потребу свою?

Ответ. Несть безместно, вся бо на торжищи предаемая, по апостолу, несумненно подобает куповати от них на потребу свою.

785. Муж христолюбив учитель премудрости мирския, име сына близ смерти суща: и тогожде старца авву Иоанна вопроси: будет ли жив, или умрет? И отвеща ту, яко жив будет. И якоже рече старец, бысть жив. И по времени сын его другий бедствоваше к смерти. И паки шед, вопроси и о том, и паки отвеща ему, яко «мы убо молимся, Божие же есть, еже сотворити с ним милость. Отсецы волю свою в жертву Богу, и благодари Ему во всех». Сия слышав и не разумев силы слова и ответа, непщеваше, яко жити имать сын его. И яко отыде к нему, и той восклонився, зряше предстоящия святыя старцы, и глаголет отцу своему: «Видиши ли святых близ нас сущих?» Оному же рекшу, яко никогоже вижду, глагола ему: се како стоят, и глаголют ми: почто приходит, и отходит отец твой стужая нам, да поживеши во плоти? Се ныне молихомся Богови о тебе, и рече: яко время его приспе изыти от тела.

Сия рек отцеви, паки рече ему: се, отче, отторгнуши мя от некоего сарацина, влекуща мя, и отведоша мя на место светло зело и неизглаголанно: и тамо видех дети незлобивыя, и глаголют ми: прошения ради отца твоего, помолихомся Богови, да на место сие дан будеши: и се совершают собрание и приобщаются. И по еже рещи словеса сия, начат глаголати молитву велику ону: Отче наш, Иже еси на небесех, и: слава Отцу, и Сыну, и Святому Духу: и тако предаде дух.

786. И отец его утешися зело, извещен быв о спасении души его. И пришед возвести сия старцеви, и моляше того узнати: чесо ради не рече явно ему о смерти сына его, якоже и о жизни другаго? И отвещав ему, рече:

Рех ти, яко ты отсецы Богови волю свою, показуя тебе сим смерть во плоти сына твоего. А о еже не ясно рещи, то поразумей вещь от себе самаго. Се ты учитель еси премудрости мира сего и имаши учеников. Аще убо речеши коему из них написати послание: тое ли, еже хощеши ты, пишет ученик твой? Или сия оставляет и пишет, еже хощет он? По истине, яже глаголеши ты, пишет, а не яже той хощет. Тако и святии: не они суть глаголющии от себе, но Бог в них глаголет, якоже хощет: овогда убо прикровенно, овогда же явно. И да уверишися, яко тако есть, Сам Господь рече учеником Своим: «не вы бо будети глаголющии, но Дух Отца вашего, глаголяй в вас» (Мф. 10, 12). Темже убо, якоже хощет, глаголет, а не якоже тии хотят.

787. Сия слышав, и извещен быв, рече: како обретаем, в житиях древних святых отец, яко вся прошения их приемляху от Бога? И отвеща ему старец: не вся прошения своя приемляху. Елика же прияша, то сия и написаша. И да уверит тя слово егангелское, глаголющее: приступи к Нему некто глаголя: «сын мой зле беснуется, и приведох его многажды ко учеников Твоим, а не возмогоша его исцелити» (Мф. 17, 16). Аще же апостоли не прияша тогда прошения сего, то како можем рещи, яко святии вся приемлют? Ибо и сами апостоли вопросиша Его удивляющеся, и глаголюще: «Владыко, како мы не возмогохом исцелити его? И рече им: сей род не исходит, токмо молитвою и постом» (Мф. 17, 19). Таже паки вопроси: и чесо ради, не приемлют всех прошений своих святии? И глаголет старец: вся к полезному человеком творит Бог. Множае бо Той полезное весть, и что благопотребно есть тем. Сего же ради, понеже человецы не ведят полезнаго себе, заповеда им, да не лишше глаголют в молитве, ина вместо инех просяще, рек: «Весть бо Отец ваш (Небесный), ихже требуете, прежде прошения вашего» (Мф. 6, 7, 8). Якоже бо щадит Бог тебе, тако и святых Своих. И тебе убо щадит, да не возвысишися, получив яве, ихже просил еси. Святых же, да не и тии возвысятся откровениями онех, яже яве глаголются о них. Не суть бо болшии Павла апостола, глаголюща: «и за премногая откровения да не превозношуся, дадеся ми пакостник плоти, аггел сатанин, да ми пакости деет» (2 Кор. 12, 7). Иди, внимай себе и помолимся Богу, да даст тебе сердце твердо и веру неуклонну. Да не соблазняешися убо о святых: не заблуждает бо глаголяй в них Дух Святой Божий. На тех бо исполняется реченное: «Дух Твой благий наставит мя на землю праву» (Пс. 142, 10). И сия слышав известися о Господе: и отыде радуяся и благословя Бога, прославляющаго святыя Своя.

Вопрос 788. Ин христолюбец вопроси тогожде старца: понеже пес угрызе отрока моего, рцы ми, умрет ли, или ни? Глаголют бо нецыи: яко угрызенный от пса внутрь четыредесяти дней умирает.

Ответ. Ниединоже зло имать, да не убоишися. Но помысли, яко писано есть: «птица в сеть не впадает, без Отца вашего, Иже на небесех» (Мф. 10, 29).

789. Сия слышав он, непщеваше, яко не умрет. Отрок же, по двою дню, умре. Велию же веру имый господин его ко старцу, и ведый, яко не лжет, удивляшеся: и не извещавашеся, яко умре. И пришед вопроси о нем, глаголя: понеже усумневаемся, умре ли отрок той или жив есть, что речеши, отче?

Ответ. Умре.

Вопрос 790. И како рекл еси, яко ниединоже зло имать?

Ответ. Понеже имел еси мнение, яко от угрызения песияго всячески умрет, назнаменах ти, яко несть сие: и рех, ниединоже зло имать: смерть бо яже от Бога ни едино же зло имать. И да явлю ти, яко имать умрети смертию, яже от Бога, приложих, яко птица в сеть не впадает без Отца нашего. Невозможно бо без повеления Божия умрети, аще и от тем ядовитых угрызен будет кто.

Вопрос 791. И чесого ради тако не ясно бысть сей ответ от вас?

Ответ. Да не удивишися, яко не рех ти явленно о сем. Не подобает бо всегда явно о таковых глаголати: вредят бо глаголющаго, а не пользуют. Не веси ли, яко Спас, хотя показати человечество Свое, смиренная она употребил есть словеса, глаголя: «где положисте Лазаря?» (Ин. 11, 34) и: «колико хлебов имате» (Мф. 15, 34), и: «кто прикоснуся Мне?» (Мк. 5, 31). Научая святых Своих, не всегда употребляти высокая. Сего ради к пользе своей отвещаваху. Аще ли же нецыи и соблажняются, да послушают Павла глаголюща: «яко мы Христово благоухание есмы, в спасаемых и в погибающих: овем убо воня животная в живот: овем же воня смертная в смерть» (2 Кор. 2, 15–16). Темже верным убо суть сия, да уразумеют и воспользуются: неверным же, да нас уничижат, и восползуемся мы.

792. Многажды случается сему старцу Иоанну, вопрошаему от некиих, посылати вопрос той великому старцу авве Варсануфию, по смирению, и наипаче егда хотяше велие и чудно дело быти. И никогдаже погреши вопрос его посланный.

Муж убо христолюбив рече единою старцу сему Иоанну: что ругаешися нам, отче Иоанне? Имея тоюжде Духа силу, и посылая ко святому и великому старцу отцу Варсануфию?

Ответ. Аз убо ничтоже есмь: аще же и был бых, то несть сие наругание. Аще бо послал бых вас, и не бы подтвердил он, то было бы наругание. Полезно убо вам есть, да два молятся о вас. «Лучше бо два паче единаго» (Еккл. 4, 9). Видится же, яко и Господь сия творяше, глаголет бо: «Отец Мой болий Мене есть» (Ин. 14, 28). Могий бо и Сам сотворити дела Отца Своего, и рекий, яко (все) «еже аще видит Сын Отца творяща, и Той тако-же творит» (Ин. 5, 16), не единою, но многажды посылаше ученики (Своя) ко Отцу, глаголя: «просите от Отца во имя Мое, и дает вам» (Ин. 16, 23). И паки: «Аз умолю Отца» (Ин. 14, 16). И паки: «Аз о Себе ничесоже творю: но Отец, во Мне пребываяй, Той творит дела» (Ин. 14, 10).

793. Чудо бывшее от обою.

Муж некий зело христолюбив и страннолюбив, и Авраамское дело совершая, бедствоваше умрети от некоего недуга: и отчаян бысть от врачев. Нецыи убо от любезных ему о Господе, послаша вопросити старца Иоанна о нем: да, аще есть конец его, заповедает (о доме).

И отвеща им: конец приспе, и должен есть заповедати о доме своем. И сия явив, рече служащему ему: взыди ко святому старцу (Варсануфию) и испроси у него молитву, яко да дарует ему Бог приложение живота, за благое его дело страннолюбия. Аще бо воспросит старец, то приимет благодать. И возшедшу служителю и просившу, сотвори старец молитву, но ничтоже рече. И паки второе и третие послан бысть от старца Иоанна ко святому великому старцу, а сей молитву убо сотвори, но ничтоже рече. Разумев сие авва Иоанн, рече ученику своему: еще не умрет человек той в недузе сем. Старец бо прият от Бога дар. Авва же сказа вся просившим о сем. Абие бо истрезвися человек оный от бедствования, и совершенное исцеление получи молитвами святаго и великаго старца Варсануфия, и подражателя его, и единонравна ему Иоанна. И уведав яже о исцелении, еще и еще преуспе странноприимством во славу Божию.

794. Нецыи христолюбцы, чающе обидими быти от некиих сильных, вопросиша тогожде старца Иоанна: должно ли им прибегнути ко инем сильнейшим лицам и купити себе их заступление? Он же отвещав рече: не купуйте заступления смертнаго и тленнаго человека: яко днесь есть, и утре несть. Дадосте ваша, и умре заступник вам: и погубисте ваша с заступлением их. Хощете ли купити заступление нетленно? То купите заступление безсмертнаго и нетленнаго Царя Бога, си есть нищих. Той бо яже суть нищих на Себе восприемлет. «Взалкахся бо, и даете Ми ясти» (Мф. 25, 35). И да увесте, яко аще купити заступление человечо, то Бог не заступит вас. Аще же речете: и како обретаем некия от отец, имущия и по плоти заступников? Не по куплению имут заступление то, но тии убо по любви Божией молиша онех, заступницы же их по вере прияша их радующеся. И осяжите среду, и обрящете, яко ничтоже дано бысть на купление таковаго заступления, ниже просиша что они лишше от них разве молитв их яже ко Богу, честнейших всякаго злата и сребра. Что бо бяше вещь та? Аще приидет гнев от Господа, то тии умолят о онех. Виждь убо и обрящеши, яко от начала до конца по Богу есть вещь сия.

Вопрос 795. Неустроению воздвигшуся во святей Божией Церкви, и чаемым некиим рукоположенным быти от не приобщающихся той, повелением царевым, и ожидаему гонению, вопросиша нецыи христолюбцы тогожде старца: подобает ли отыти и сокрыти своя? Он же рече:

Ответ. Есть ли кто сильнейший Бога? Аще в руку Божию есмы, и поем с Давидом, яко «в руце Твои предложу дух мой» (Пс. 30, 6), что боимся? Обаче не рече ли Бог, превратити Ниневию град? Еда ли преврати? Ни. Но покаяния ради их, прости ему. Темже и мы покаемся Богови, и умирит вся. И паки: еда сильнейший есть земный царь сей паче Навуходоносора? Но обаче Даниил и трие отроцы, умолиша Небеснаго Царя Бога, и покори им царя. Вопрошение же ваше сугубую имать брань, боязни и сребролюбия. Мы в руку Божию есмы, и власть имать сотворити в нас волю Свою. Да не бежите убо, ниже сокрыете что от ваших.

Вопрос 796. Тиижде паки вопросиша тогожде старца: како убо писано есть: аще гонят вы во граде сем, бегайте во другий (Мф. 10, 23)?

Ответ. Но мы не у изгнани быхом.

Вопрос 797. Пресвитер некий, избран быв от граждан на епископство, посла вопросити тогожде старца: изволит ли Бог быти ему?

Ответ. Брате, паче мене вопросил еси. Малейший бо есмь человек, и в сию меру не достигох. Обаче оставил еси апостола, и мене ли вопрошаеши, никогдаже положшаго начало еже быти инок? Что глаголет апостол? «Аще кто епископства хощет, добра дела желает: подобает же епископу быти непорочну» (1 Тим. 3, 1–2) и прочая. Но понеже Писание глаголет, аки от лица Божия к сыновом Израилевым: «Яко аще вопросите о имени Моем лжепророка, и достойни есте услышати истину, слово истинно вложу во уста лжепророка рещи вам». Сего ради и аз ти глаголю: яко аще добре украсил еси дом твой и уготовал еси сердце твое ко приятию таковаго благовоннаго мира, по учению апостолову, уготовано ти есть от Бога. Неложен бо есть Глаголяй: «даст ти Господь, по сердцу твоему» (Пс. 19, 5).

Вопрос 798. Сельский епископ некий вопроси тогожде старца: аще должен есть оставити сельское епископство и отыти в монастырь?

Ответ. Оставити вверенное тебе попечение святых Божиих церквей не советуем тебе, но внимати души твоей по страху Божию; да не возмеша даров от кого: да не уклониши суда: да не усрамишися лица сильна и обезвиниши повиннаго или осудиши безвиннаго. И сребролюбие далече сотвори от себе, еже есть корень всем злым. Таковое бо называется, и есть второе идолослужение. И не высокомудрствуй, да будеши ученик апостола, глаголющаго: «не высокая мудрствующе, но смиренными ведущеся» (Рим. 12, 16). Не буди человекоугодник: веси бо, что есть отложено тому: чуждь бывает рабства Христова. Глаголет бо апостол: «Аще бых еще человеком угождал, Христов раб не бых убо был» (Гал. 1, 10). И повинися Господеви, глаголющему: «Научитеся от Мене, яко кроток есмь и смирен сердцем, и обрящете покой душам вашим» (Мф. 11, 29). Угаси гнев от себе, яко падение есть человеку. Вся по Богу твори, и обрящеши Того помощника. Всегда же бойся смерти: подобает бо той приити на нас. Поминай час исхода, и не согрешиши Богу. И аще постигнеши безмолвствовати, обрящеши покой и благодать, идеже аще убезмолвишися.

Вопрос 799. Епископ некий от иноков, имея великую веру ко старцем сим, посла вопросити великаго старца: должно ли ему оставити мир и на уединенное житие возвратитися, купно же и прося молитвы от него и благословения и помощи.

Ответ. Благовременно есть мне рещи слово апостола, глаголюща: «бых не смыслен, (хваляся), вы мя понудисте» (2 Кор. 12, 11). Но понеже по Богу суть глаголемая, а не по человеку, буди мне рещи Ему, реченное угодником Его Моисеем: «или введи со мною написаннаго мне сына духовнаго в жизнь вечную, или и мене изглади из книги Твоея» (Исх. 32, 32). И «не буди ми видети лице Иакова отца Иосифова, не имущу Вениамина со мною» (Быт. 44, 26). И верую во имя Его святое, яко не отринет прошения моего. Радость бо Святыя Троицы и святых Ангел есть спасение спасающихся. Не престаю убо молити Бога, дондеже обрадует мене о спасении твоем. Но вонми, да не ослабят сия помысла твоего в нерадение. Над всеми сими, поминай, яко мир преходит и слава его привременна есть, и наслаждение его тленно. Избери себе страдати с людьми Божиими, нежели имети временную греха сладость. И паки, яко невольно оставляем мир сей, и несть долго житие наше сие. Что бо есть жизнь человеческая? Наипаче, яко надеяния жизни не имамы в мире сем от утра до вечера. Хотяще оставим вещи, да имамы воздаяние. Изберем безпечалие еже от земных вещей, желающе явитися лицу Божию, да со дерзновением глаголем: изведи из темницы душу мою, исповедатися имени Твоему (Пс. 141, 8). Потщися, скоро шествуй, яко день есть, дондеже не постигнет нощь, в нейже плачут ленивии и унылии, кающеся тогда всуе. Разумей, яко время не медлит. И аще постигнет час, служитель неумолим бывает. Кто бо моли его, и услышан бысть? Раб есть истинен истиннаго Владыки, исполняяй искренне повеления Его. Убоимся страшнейшаго дне и часа онаго, в оньже не заступит нас брат, или сродник, или начальство, или власть, ни богатство и слава. Но, се человек, и дело его. Продадим тленныя вещи, влекущия нас во глубину погибели, и купивше себе одежду брачну, приидем в совершенство. Аще бо приидем в совершенство, то постизаем совершенство оно совершенныя по Богу любве, вон изгонящия страх, и поем радостно со апостолом Павлом: «любы николиже отпадает» (1 Кор. 13, 8). Чадо истинное, о да увижду тя во Царствии Бога моего, о Христе Иисусе Господе нашем. Целую тя о Господе, именем Божиим. Целую тя о Христе Иисусе. Целую тя в Дусе Святе, о честнейше!

800. Ин епископ посла прося тогожде старца Варсануфия, дати ему завещание.

Ответ. Что реку к вашему боголюбию? Реку, яко не леть есть рабу дати завещание Господину своему. Но еще и ныне не избавихся тщеславия моего, воеже имети себе раба быти всем. Недоумеваюся убо, не обретая извинения. К сему же точно обретаю прибегнути, яко, прости мя Господа ради, и помолися о мне, да не осужден буду в пришествии вашем и да разумею, яко есть Бог, и попекуся о Божественных Его заповедех, и помилован буду.

Вопрос 801. Прению бывшу о вере, послан бысть некий епископ от царя, и вопроси тогожде великаго старца писанием, глаголя: что подобает сотворите? Чаяше бо развращение обрести и у некиих сильных в мире, не имущих здраваго разумения о вере.

Ответ. От нихже научает нас вестник ваш, обретаем, яко купно с воскресением еже по Богу, имеяше Даниил дружбу царя. И имея надежды своя на Бога, спасающаго рабы Своя, и близ суща всем призывающим Его во истине, не убояся прещения онаго, и навета царскаго повеления, ниже ужаснуся самаго, но утверждена верою Христовою, препрослави его Бог за веру ону. И аще истинно есть, яко сердце царево в руце Божией, то аще восхощем право поступающе, преклонит е. Здравствуй о Господе, здравствуй.

Вопрос 802. Епископ за сребролюбие и другая падения осужден и от людей за сия ненавидим, обличен бысть от собора места того. И по обличении сотвори отрицательныя грамоты и отыде общим установлением от престола. Жителие же града того, триех мужей судивше достойных быти епископства, усумневахуся, коего подобает из них избрати, и послаша вопросити великаго старца Варсануфия.

Ответ. Вы ни единаго изберите, но дадите избрание тое епископу, и егоже аще известит ему Бог, даст вам.

Вопрос 803. Ин христолюбец вопроси тогожде старца. Еда всячески даст им Бог единаго из тех?

Ответ. Аще с единомыслием и правостию сердца и по вере Божией хотят, не точию единаго из тех, но и Ангела с небесе, аще вопросят, еже есть равноангельна мужа, подаст им Бог. Не мож ет бо солгати Рекий: «просите, и дастся вам. Всяк бо просяй приемлет» (Мф. 7, 7, 8), а ко иже зле просящим, рече: «просите и не приемлете, зане зле просите» (Иак. 4, 3).

Вопрос 804. Что убо, яко между сими есть един лучший инех, еда того даст Бог?

Ответ. Уставление, еже о них аще дадут архиепископу, то егоже аще зрит Бог, яко паче инех воспользует их, сего и даст. Аще бо, на пример, жесток будет, и еще требуют наказания ко исправлению, таковый дастся им.

Вопрос 805. Аще разделяется град от таковых, и овии убо по вере некия просят, овии же по пристрастию: будут же представленнии от обоих частей добри, что отсюду бывает?

Ответ. Просящим по вере, дает Бог; а онем не дает: не яко отвергая представленныя от них, но злое прошение их.

Вопрос 806. Что убо, яко представлен не по вере просящими, угоднейший имать быти, паче представленнаго по вере просящими?

Ответ. Бог сердцеведец, взирая на произволение добре просящих, дает им представленнаго от других, не за прошение онех бываемое злым помыслом, но ради благаго сих произволения, усердствующих убо взяти лучшаго: от неведения же не представляющих того.

Вопрос 807. Но обретаются и не правым помыслом просившии, и тии не по достоинству получившии благое: что убо бывает?

Ответ. Достойных ради милует Бог и недостойныя. Той бо дождит на праведныя и неправедныя. Явил же есть нам сие святым писанием, глаголя ко Аврааму: «аще обрящу десять праведных во граде, не погублю места того их ради» (Быт. 18, 31). Аще же десятих ради праведников град оставляше, кольми паче толиких ради пощадит и иныя.

Вопрос 808. Что убо, яко они убо доброю верою представляют: а обаче ни един от представленных имать благопотребен им быти, убо от себе ли даст Бог кого?

Ответ. Понеже достойни суть благодеяния, презирает Бог избрание. И по времени всячески внушает им другаго избрати, или имущему власть рукоположения инаго дати им благопотребнейшаго паче представленных ими.

Вопрос 809. Что убо, яко вси просящии неправым помыслом просят: благаго же всяко избирают: еда дастся им, или ни?

Ответ. Провидец Бог, аще видит, яко имут покаятися, даст им того, достойни бо обретаются за будущее покаяние. Аще ли же видит, яко без покаяния суть, то не даст им таковаго, за их недостоинство.

Вопрос 810. Рекл еси, отче, яко аще и разделится град, то причастницы бывают и недостойнии даемаго блага, добре просящих ради: како убо будет реченное Писанием: яко всяко царство раздельшеся на ся не станет? Се бо разделяется град, и чрез добрых онех весь станет.

Ответ. Разделятися глаголется, еже уклонитися двум частем во злое: тогда бо сбывается оно «не станет» (Мф. 12, 25). (Аще ли же едина часть станет), яве, яко во благом, то сие не творит разделения: учение бо апостолов едино есть. И апостол рече: «Аще ли неверный разлучится» (1 Кор. 7, 15). Что убо, речем ли, яко от сего разделилась есть церковь, и не станет? Да не будет! Рече бо Господь: «врата адова не одолеют ей» (Мф. 16, 18). Но не стояй в части благаго, сей разделися от нея: стояй же не разделился есть.

811. По данному убо им ответу от старца, тако граждане сотвориша, и триех онех избраша: и дан бысть им епископ свят и благоугоден Богови. А первый, на деньги уповая, отыде в Византию, прося прияти епископский престол. И вести притекшей, яко получил есть, вси быша в подвизе: и послаша вопросити старца: что подобает сотворите? Стыдяхуся бо дати знати цареви о погрешении надежды и случившейся в церкве тщете, и сказа им старец:

Ответ. Послите моление уверяющо царя о изгнании онаго, яко правильно бысть, и списки увольнительных его писаний о увольнении его, и благодарение о избрании сего, яко от Бога, а не от человек бысть. И тако извещение приимет царь отсещи помысл от него. Хотящии же зле сотворити вещь, не возмогут, разве точию зле погубят деньги своя, и послежде постыдятся. О иждивениих же, якоже рече Писание: отыди, Сампсоне, со иноплеменники.

812. Сия услышавше, обленишася послати моление, а той достиже митрополии ко князю с царским повелением, якоже бы восприяти престол свой. И бывшей многой молве и смятению во граде, послаша припадающе ко старцу о сем.

Он же сказа им сия: зле сотвористе, обленившеся дати знати цареви: ненавидит бо Бог лености. Обаче о имени Господни глаголю: яко врат градских аще и достигнет, но во град не внидет, не допускает бо его Бог.

Сия рекшу старцу, и князю града достигшу во еже исполнити царское повеление, и всем в тузе и страсе сущим, внезапу приспе весть, смерть цареву возвещающая, и вся чаемая разсыпашася; и отыде безделен, всуе сребро свое сам истощив, якоже прорече старец. Самеми бо известися делы проречение оно. Еже бо связа на земли, связано и на небеси, по словеси Господню.

Вопрос 813. Проставленный епископ, имея себе недостойна святительския службы, и не довольна ко управлению церковных дел, помышляше удалитися, и посла вопросити тогожде великаго старца о сем.

Ответ. Радуйся о Господе, рабе Божий, и священнодействителю Святых Таин. Веси, яко святый апостол Павел пиша, глаголаше: «братие, кийждо в немже призван бысть, в том да пребывает пред Богом» (1 Кор. 7, 24). И аз верую, яко волею Божиею был еси, и неси наемник, но пастырь. Не восхощи убо удалитися, да не прогневаеши Его. Той бо рече: «небо и земля прейдет, словеса же Моя не прейдут» (Мк. 13, 31). Да не убоишися убо: писано бо есть, яко по скончании Моисеови, убоявшуся Иисусу Навину, ввести люди в землю обетованную, рече Ангел к нему: «Мужайся и крепися, не бойся: зане якоже бех с Моисеом, тако буду и с тобою» (Нав. 1, 6–7). И от мене убо окаяннаго услыши тоежде слово: мужайся и крепися о Господе.

Вопрос 814. Тойжде вопроси инаго старца: киих подобает, отче, рукополагати причетников, или кое имущих житие?

Ответ. Достойных Бога и добрых подобает рукополагати, яко да служат на святых жертвенницех Божиих: наипаче свидетелствованных от инех человек многих, по Писанию. Таковых должни есте тщатися рукополагати, и судити их по рукоположению, яко суд церкве имать Бог истязати от вас, аще удалитеся от нея. И сие творяще, показуете Богови произволение ваше, яко добрых человеков хощете рукополагати церквам Божиим.

Вопрос 815. Аще святии отцы засвидетельствуют о некоем, аки достойном рукоположения, не должен ли доволен быти свидетельством их, не требуя одобрения многих?

Ответ. Подобает довольну быти свидетельством отец, по воли бо Божией глаголют: и таковых хощет Бог служителей Своих. Аще же по таковом свидетелстве, обрящеши помысл от себе негодующ, то сие плевел есть диавольский.

Вопрос 816. Что убо? Яко по свидетельстве отец, отрицается он прияти рукоположение? Или и рукоположен, удалися?

Ответ. Аще отрицается, да наведется ему убеждение. Аще ли же и по убеждению рукоположения избежит, то несть сие укор рекшим о нем: но укоризна тая ему есть, яко отверже волю Божию. Должен бо бе искусити себе и потрудитися в деле том. И егда себе увидит не могуща, то паки, аки растворен солию Божиею, да вопросит святых, и по совету их да сотворит. Мнози бо от святых отрицахуся, и принуждени быша от Бога. Ино и Моисей рече: «Виждь, избери могуща иного» (Исх. 4, 13). И Иеремиа глаголет: «Отрок есмь аз, и не могу глаголати» (Иер. 1, 6). И друзии от отец бежаша рукоположения: восхищени же и рукоположени бывше, удержаша служение сие имене ради Божия. Принуждаемый же на сие приити и отрицаяйся, послушания бегает. И Писание глаголет: «Благо послушайте паче жертвы» (1 Цар. 15, 22). Аще ли же кто помыслит иныя безмолвствующия, и не сретающияся ни с ким, отнюд не должен есть помыслити о них что таково, яко приити (им) посреде человеков. Аще ли же кто сретается, и бывшей потребе, не отрицается внити в веси и грады: и будет свидетельствован, яко добр есть и способен, то таковых должни епископи и восхищати и рукополагати: сии бо могут не точию свою душу воспользовати, но и инех. Сего бо ради повеле Павел апостол Титу поставити во всей церкви пресвитеры, сиречь достойны дела сего, Яков и Тимофей бе. И святый же Григорий Богослов, и подобнии ему по принуждению быша. И аще испытаем, то и ини мнози обрящутся во времена наша раби Божии, тожде подъявше. Обаче лишше скорбяще, претерпеша труд оный, боящеся отврещися воли Божия. Аще ли же кто безразсудно отречется, то молитв треба, да не оскорбит отречение тое душу его. Случается бо яко оправданием сатана запинает человека. Егоже да упразднит Господь далече от душ наших, и от всех боящихся Его. Аминь.

Вопрос 817. Тойжде во страсе Божии хотя рукоположити диаконы церкви и произвести некия в церковныя должности, не ведая, киих по Богу изберет, посла ведение томужде старцу, объемлюще имена причетников тех, да ихже хощет, той изберет. Старцу же избравшу некия от них мнимыя по человеку неспособныя быти ко управлению, удивлься епископ, вопроси его о сих?

Ответ. Он же рече сице: еда от себе рех что? Молитву сотворих, и еже аще извести мне Бог, рех: и не яко достоин есмь, речен бысть ответ сей мною. Нужде бо бывшей, и уста осляте отверзе Бог.

Вопрос 818. Тойжде посла вопросити, тогожде старца Иоанна: како могут сии вступити в дела, или на ответы нуждныя послани быти, невежды суще словом и удобопрезираеми человеки бывающе?

Ответ. Рцы господину епископу: аще будет якоже Авраам, то от камения сего может Бог воздвигнути тебе чадо. И аще потщишися имети всю свою надежду на Бога, то, немы и безумны человеки аще поставиши икономы и евдики (евдики – защитники прав Церкви и вообще христиан пред судом гражданским, сия должность была установлена еще в V веке по Р. X.), страшнейши паче князей сотворит их Бог. Аще и на ответы их послеши, вся, елика хощеши, совершиши ими, во славу имене Его. Аще ли же ни, то аще и ритора предстателем послеши, якоже идет, тако и приидет. Браненачальницы бяху сынове Израилевы, и егда исправляху сердце свое, побеждаху враги, а егда нерадяху о спасении своем, побеждаеми бываху от врагов своих.

Вопрос 819. И како могу быти, якоже Авраам?

Ответ. Не рекох, аще не будеши якоже Авраам по всему, но во отсечении точию воли своея, якоже он, и в том, еже пожрети сына своего произволением. Ибо многа бяху исправления того. И аще не можем во всех ему уподобитися, но во явных можем.

Вопрос 820. Извещен есмь, яко, яже глаголете, от Бога суть, и должен есмь всеконечно сотворити. Но понеже непщую, всех, иже суть церкве, о сем на мене соблазнятися, и отягощается от сего помысл мой: что повелеваеши? Да сих ли всех приставлю к делом, или мнящихся быти нам потребных?

Ответ. Господь рече: «Аще кто не возненавидит отца или матерь, жену, чада, еще же и душу свою, не может Мой быти ученик» (Лк. 14, 26). А еже возненавидети душу, есть, да купно с подвижничеством отсечет кто и своя хотения. И таковый ниже словесем человеческим, ниже человекоугодию внемлет, но вопрошением Божественным, и ответом из уст святых. Веровати же подобает вопрошающему, яко по сердцу его влагает Бог во уста вопрошаемаго. Глаголет бо: «даст ти (Господь) по сердцу твоему» (Пс. 19, 5). Явихомся убо, яко человецы есмы, не могуще терпети поношений и скорбей от человек. Аще бо и восхощет кто всех назидати, то не может: ниже бо вси тожде хотят. Вопросил мя еси о совершенстве, си есть еже поврещи все Богови, сиречь, избрати ихже хощет, и егда услышахом, не прияхом, и не вемы, яко не якоже видит Бог, видят человецы. Человецы бо явленная разсуждают, имут же примешану и волю свою: Бог же неявленная и глубины сердца: и зрит будущая, яко настоящая. Зане убо много пользова, еже познати, яко еще пребывает в нас человеческое, да узнаем меры наша, где есмы, и смиримся, да приимем благодать смиренных: помолихомся Богови, да якоже даде пророку Иезекиилю, вместо мотыл человеческих, мотыла говяжия (Иез. 4, 15), и израильтяном царя (1 Цар. 8, 7, 9), егда увиде их сего хотящих, тако да снизойдет воли немощи нашея. И се снизыде благость Его, и пресече нам волю Свою. Аще убо укорим себе, глаголюще: яко еще зелие ядим, то сподобит нас Бог твердыя пищи, яже есть совершенных о Христе. Аминь.

Вопрос 821. Понеже нотария (писмоводитель) имам благоговейна и потребна, и свидетельствованна, не смею же рукоположити его, да не соблазню некия, яко своего сотворив: что повелеваеши, да сотворю?

Ответ. О нотарии не добре разсудил еси. Ибо, аще бы зол и неспособен был и не свидетельствован, то добре глаголал был еси. Аще ли же, яко добр и искусен свидетельствуется, то да не оправданием преступиши заповедь апостола, глаголющаго таковыя творити. Сие же да увесте, яко аще кто творит дело по страху Божию, не уклоняя сердца своего в человеческая, то сему аще припоследует соблазн, не пребудет, ниже вредит кого. Соблазн бо сей зависти есть диаволи: не бо творит плоды добры зло древо: якоже ниже доброе, злы (Мф. 7, 17). Молю простите мя Господа ради и помолитеся о мне.