Текст книги "Аскетика. Том I"

Вопрос 669. Ин христолюбец вопроси великаго старца: полезно ли ему оставити жену свою, с намерением еже иночествовати?

Ответ. Чадо, да не будет оставление ея от тебе. Понеже преступиши заповедь апостола, глаголющаго: «привязался ли еси жене, не ищи разрешения» (1 Кор. 7, 27). Зане, аще согрешит и пойдет зле, на тебе взыдет грех: аще не по согласию, с советом, пользы ради. Но остави вещь на Бога, и якоже хощет, сотворит человеколюбие Его.

Вопрос 670. Ин христолюбец вопроси тогожде великаго старца, глаголя: что сотворю, яко скоро впадаю в страсти?

Ответ. Да не положиши с ними завета, и отврати очи твои, еже не видети суеты, и руце твои от лихоимания, и избавит тя Бог от них. Честно убо пребывай, и да не приимеши пищи ниже пития в сытость, и смирятся от тебе страсти оны, и обрящеши покой.

Вопрос 671. Ин христолюбец, учитель премудрости мирския, вопроси тогожде великаго старца: аще будет благополучен, преходя в светлейшее достоинство? Великий же рече:

Ответ. Да не высокомудрствуеши, и обрящеши благодать у Бога, и у человек, и довольство велие, идеже аще ни будеши.

Вопрос 672. Тойжде вопроси инаго старца. О томжде.

Ответ Иоанна. Ныне смиренная мира сего избра Бог. Имей смирение, и поможет ти Бог вскоре.

Вопрос 673. Тойжде моли тогожде старца Иоанна, да помолится о беснующемся некоем.

Ответ. Да постится и сам, елико может, то услышани будут и молящиися зань. Многа бо может молитва праведнаго поспешествуема. И Господь рече: род сей не исходит, токмо постами и молитвами.

Вопрос 674. Ин христолюбец вопроси великаго старца, глаголя: понеже разбойницы внидоша в дом мой, грех ради моих, и ничтоже из дому моего взяша: убо востану ли на них (злословя) или юрод сотворюся?

Ответ. Аще всяко имамы, яко грех ради наших внидоша разбойницы, Бог же Своим человеколюбием не попусти злу быти, то по коему образу хощем сами себе отмстити, а не оставити вся Богови, глаголющу: «Мне отмщение, Аз воздам» (Рим. 12, 19). Аще боимся Бога, то егда видим их страждущих нечто, по силе нашей помощи им должни есмы. Но понеже в сие не доспехом, да не когда и хотяще помощи им впадем в тщеславие, то ни зла, ни добра им да не творим, но возблагодарим, не по грехом нашим Сотворшему с нами.

Вопрос 675. Аще бы же и случилось им украсти что от нас, то что подобаше нам сотворити?

Ответ. Совершенных убо есть еже о всех нерадити: сущих же во второй части, еже взяти та, яже погубиша, или отщетитися мало, взирающе на тесноту и скудость взыскуемых. Сие же иногда приводит кого, и во еже употребити законов, противу безумных онех. Да разумеем же, яко и отрасль сребролюбия есть сие дело, и рождает нам вред душевный, и преступает заповедь, глаголющую: «аще хощет судитися с тобою, и ризу твою взяти, отпусти ему и срачицу» (Мф. 5, 40).

Вопрос 676. Что убо, отче, аще кто приидет хотя взяти ризу мою, дам ли ему абие? И шлицы суть зли и лукави человецы, лакоми суще сие сотворити, якоже, аще бы возмогли, и нага кого оставити?

Ответ. Не сие глаголет, да (всякому) хотящему просто взяти, даси ю, но хотящему судитися с тобою, еже безчеловечие знаменует, и судища, раждающая души вред. Зде убо плотских подобает нерадити, душевнаго ради спасения. Глаголет бо: «кая польза человеку, аще приобрящет мир весь, душу же свою отщетит» (Мф. 16, 26).

Вопрос 677. Понеже убо суть нецыи искус судищем имуще, и не тако вредятся, якоже неискуснии в сих. Убо добро ли есть чрез них творити таковая?

Ответ. Аще и искус судищем имут, но обретаемся и мы вину им прилагающе вреда. Обаче в разсуждении, оно есть не мнее. Еже бо собою творити таковая, в погибель души нас ведет. Аще ли же и они подобие нам вредятся, то мы бываем вреда их виновни, и грех на нас востекает, и туюжде приемлем тщету. Писано бо есть: «подобает злу приити, горе же, егоже ради приходит» (Лк. 17, 1). Аще ли же кто, не доволен быв избавлением, тщится, да соперницы его зло постраждут, то сие горше всех есть, и множае прогневляет Бога, рекшаго «не воздати зла за зло» (Рим. 12, 17); и оно: «оставится вам» (Лк. 6, 37).

Вопрос 678. Егда будет потреба засвидетельствовати о истинном убийце: подобает ли солгати, да не умрет?

Ответ. Аще ни в едином же деле солжеши, то ниже в сем. Писано бо есть: «да не помилуеши нищаго на суде» (Исх. 23, 3). Аще бо не будет воля Божия, то не умрет. Аще ли же кто и во инех лжет, и хощет, то и в сем да солжет, якоже обычай имать. Писано: творяй грех, творит и беззаконие (1 Ин. 3, 4). Аз не связуюся сим. Аще ли же не имаши нужды свидетельствовати, то потребу имаши рещи ничтоже. Притча бо есть полезна: яко, еже рещи, не вем, не ввергает в темницу.

Вопрос 679. Аще кто имать должники богаты, должен ли истязати от них лихвы. Аще ли же убоги, приимет ли от них деньги своя, яже даде?

Ответ. Писано есть о праведнем: сребра своего не даде в лихву. Сие же знаменует, да еже дахом, приимем.

Вопрос 680. Аще ли же обнищают нецыи от них?

Ответ. И о сих писано есть: аще обнищает брат твой, да не оскорбиши его в истязании.

Вопрос 681. Аще же и той убог есть, и аз убог есмь: еда согрешаю, истязуя его нужды ради моей?

Ответ. Не согрешаеши. Обаче, елико возможно, добро есть не оскорбити кого от братий своих, не имущаго отдати.

Вопрос 682. Егда отщетеваюся, и не скорбит сердце мое, глаголет ми помысл, яко сие суровость есть, но должен еси скорбети убо, благодарити же: добре ли глаголет мне?

Ответ. Не подобает о вещи мира сего скорбети отнюд, но о гресе едином.

Вопрос 683. Еже радоватися с радующимися, и плакати с плачущими: како есть?

Ответ. Еже радоватися с радующимися есть, еже сорадоватися исправляющим добродетель по Богу, и упованием будущих благ веселящимся. А еже плакати с плачущими, еже сострадати согрешающим, в покаянии о гресе.

Вопрос 684. Аще возлюблен мне изгубит чадо свое, или вещи, и скорбит, како должен есмь соскорбети с ним, аки с возлюбленным?

Ответ. В сем самом купно скорбети подобает, да не когда многою печалию одержимь, умыслит нечто, вредно души своей, не терпя благодарно вещи.

Вопрос 685. Понеже писано есть: блажени миротворцы, убо добре ли есть тщатися о мире всех?

Ответ. Еже свое сердце умиротворяти, лучше есть. И сие коемуждо приличествует, и блажен сие творяй. А еже примиряти крамолящияся, не есть всякаго, но могущих без (всякаго) вреда сие прейти. Немощный же, радоватися должен о мире всех: не вдавати же себе в ходатайство примирения всякаго (человека), разве любимых ему по Богу. И сие, егда не предлежит ему тщета душевная.

Вопрос 686. Егда по Богу вещь творю, и уничижение приемлю от человек, скорблю, аки соблазняяй их.

Ответ. Аще уничижен будеши не праведно, да не печалуеши. Диавол бо завидит благому, и на пресечение онаго подвизает сия, но послежде упраздняется и во славу ведет дело тое Бог. Аще ли же согрешая, праведна уничижен будеши, стыд себе наносиши: но аще покаешися, в радость сие преложится.

Вопрос 687. Ин христолюбец, зле страждущ от некоего, яви томужде

великому старцу о сем.

Ответ. Благосотвори ему.

Вопрос 688. Сия творя, паки зло страдаше от него, и яви паки старцеви, глаголя: се благотворю ему, и не престает озлобляти мя.

Ответ. Не оному твориши благое, но себе. Господу рекшу: «добро творите врагом вашим, и молитеся за творящих вам напасть» (Мф. 5, 44). Кийждо бо по делу своему приимет.

Вопрос 689. Ин христолюбец, странноприемляй отцы, вопроси тогожде старца: что сотворю, яко присно скорблю, яко аще приходит кто от отец, не обретаю предложити ему нужных вещей?

Ответ. Сей помысл от диавола есть – довлеет бо им предложити обретающаяся, по реченному: довольни сущими, и Бог им извещение подаст. Аще бо кто ищет сих вещей, не может странноприимец быти, но молится никомуже прийти к нему. Аще убо имея что предложити, щадиши е от скупости, аще и тмами угодити им потщишися, не приимет извещения сердце их, разве аще требуеши вещи на иную потребу нужнейшу, или на подаяние негли немощным, или лицам честнейшим. Вся бо подобает творити с разсуждением и страхом Божиим. Аще ли же прилучится и тебе отыти инуде, не чай обрести покоя, и не смутишися. Аще бо возчаеши (обрести), и не обрящеши, то оклеветаеши приемшаго тя; а оклеветание смерть есть душе. Но благодари во всех: сия бо есть духовная и душеполезная пища и покой.

Вопрос 690. Что убо, аще не приимут мя отнюд, и буду утружден от путнаго шествия и требуяй пищи?

Ответ. Воспомяни, кто пекийся о всех, и всех питаяй, яко Бог есть. Аще убо бы хотел Бог напитатися тебе, то подал бы им извещение прияти тя: не приемшим же им, яве есть, яко Бог не хощет, и не суть они повинни. Вся бо бывают во искус и спасение человеку, яко да претерпит и укорит себе во всех, яко недостойна.

Вопрос 691. Ин христолюбец вопроси тогожде старца Иоанна: помысл влагает мне боязнь, яко может диавол сотворити тя согрешити, аще ты и не хощеши; повинен бо ему сотворился, и зело скорблю от сего.

Ответ. О диаволе не думай, яко власть имать на кого: зане вина греха по произволению нашему обретается, а не по принуждению приемшаго власть: якоже убо не имать человек принуждения на спасение, тако ниже на грех. По власти ли прельсти Еву, или по совещанию? Нигде же видится власть. Понеже никтоже смеяше бежати от имущаго власть. Мы убо таковии есмы, якоже человек свободен поработився кому своим произволением, иже временем приходит в себе и кается. И аще не прибегнет к сильнейшему паче его, то не может кто себе избавити. Аще ли же прибегнет, прочее он ведый, яко несть его раб собственный, не смеет что сотворити ему, Крепльшаго ради его. Темже яве есть, яко власти над человеком не имать. И ты убо рцы помыслу тому: яко убо должник есмь, но прибегох к Могущему избавити, и Призвавшему мя, и Глаголющу: приидите ко Мне труждающиися и обремененнии, и Аз упокою вы. И должен есмь всегда бодрствовати, да не паки впаду в руце его. Аще ли же паки речет помысл, и понеже не может тебе принудити согрешити, се безгрешен обретаешися, и отягощает тя от сего помысла, рцы ему: аще речеши мне, ктому не согрешаю, не верую тебе, аще не достигну града (небеснаго). Аще бо кто совершит путь весь, и имать еще едино поприще, и тамо возляжет, то ничтоже пользова: вне бо есть града. Пред Богом убо повержем неможение наше, и Той ти упразднит козни, молитвами всех святых Своих. Аминь.

Вопрос 692. Понеже нивы мои прузи вредят, и аще иждену, окрестнии сварятся с нами: и аще оставлю, потерплю вред. Что сотворю?

Ответ. Возми воду освященную и покропи на нивах твоих. И аще с миром и без свары возможеши отгнати, или закопати, несть ти грех. Аще ли же свара будет, на пользу души твоея остави вещь Богов, и еже будет, волею Божиею будет.

Вопрос 693. Что убо, владыко? Аще всяко восхощем отгнати гнев Божий, не раздражим ли сим Бога?

Ответ. Совершеннии убо не отгоняют его: имут бо всю надежду свою на Бога. Но мы, понеже плотстии есмы и требуем земных вещей; осуждающе себе самех, яко согрешающих в сем, да отженем с молитвою и псалмопением, молящеся Богови, да простит нам, и тщащеся прочее благодарити Ему. Аще бо и сие прейдет, горшая сего нанесут нам греси. И невозможно, без покаяния и милостыни, престати от нас злым; глаголет бо: блажени милостивии, яко тии помиловани будут. И да не речеши, и чесого ради в наказание наше нанося Бог гнев, терпит не кающихся, и отгоняющих его? Бог бо по прещению наносит гнев, да покаемся. И терпит нас отгоняющих (его), чая долготерпением Своим обращения нашего к Нему. Аще бо пребудем в техжде, то, и по еже изгнати, в горшая злая впадем. И исполнится на нас пророческое слово: «врачевахом Вавилона, и не исцеле» (Иер. 51, 9). И несть инаго чаяти, точию муки вечныя, и тмы кромешния, и червия не усыпаемаго, и скрежета зубов.

Вопрос 694. Понеже вино, еже хощу истоптати в моем точиле, жидовско есть: убо не грех ли есть?

Ответ. Аще, егда дождит Бог, на ниву твою дождит, а оставляет жидовскую, то ниже ты истопчи вино тем. Аще же человеколюбец есть ко всем, и дождит на праведныя и неправедныя, почто ты хощеши быти безчеловечен, а не паче щедр, якоже Сам глаголет: будите милосерди, якоже Отец ваш Небесный?

Вопрос 695. Аще кто вверит мне слово некое, завещав никомуже рещи; а другий заклинает мя исповедати ему: что сотворю? Аще бо реку, опечалю уверившаго мне; аще же не реку, оскорблю вопросившаго мя; и паки боюся клятвы.

Ответ. Заклинаяй тя (рещи), той понесет грех. Не подобает бо, вины ради клятвенныя, явити тайну братнюю. Рцы же ему: аще бы ты вверил еси мне слово, было ли бы тебе приятно, да изъявлю тое иному? Аще убо тебе не было бы приятно, то ниже да просиши мя рещи тебе слово братнее. Речено бо есть: еже ненавидиши быти тебе, да не сотвориши ближнему твоему. И паки: еже аще хощете, да творят вам человецы, и вы творите им такожде.

Вопрос 696. Како должен есмь в залозе имети: яко всяк человек праведен, или яко всех человек аз грешнейший есмь? Сумневается бо помысл имети всякаго человека праведна.

Ответ. Имей себе грешнейша и последнейша всех, и имети будеши покой.

Вопрос 697. Егда беседую кому о житии святых отец и о ответех их, велемудрствует сердце мое. Рцы убо мне: како со смиренномудрием беседовати имам? И кому должно глаголати сия? И каким намерением.

Ответ. Егда беседуеши о житии святых отец и о ответех их, должен еси себе осуждати, глаголя: увы мне, како глаголю добродетели отец, и ничтоже стяжах от них, ниже приидох во успеяние? И сижу, глаголя инем, да пользуются? Да не когда на мне исполнится реченное от апостола: научая инаго, себе ли не учиши? И егда сия глаголеши, сгорати будет сердце твое, и обрящешися глаголяй со смирением. Должен же еси внимати, кому глаголеши. Аще веси, яко имать спользоватися, тогда побеседуй. Аще ли же ни, несть потреба беседы. Писано бо есть: блажен глаголяй во уши слышащих. Да не когда обрящешися, подаваяй святая псом и повергаяй бисер пред свиниями. Господь да вразумит тя, брате, еже бы не заблудити от пути смирения.

Вопрос 698. Два христолюбца беста, искренно любяща друг друга о Господе, и от отец в жизни наставляема. От сих един, в собеседовании, рече слово о ином некоем. Другий же, по совосхищению диаволю, помыслив, яко к нему рече, смятеся зело. И оному известна его творящу о сем, не приимаше. И отсюду бывшу между ними малу прекословию приидоста оба ко отцем и явиша томужде старцу дело то.

Ответ. Яко единодушным глаголю вам всю истину пред Богом. Оба должни есте принести покаяние Богу, не леностно, но от всего сердца, да простит вам молитвами святых отец ваших. Ты убо, яко оклеветан быв, не понесл еси поречения онаго, глаголя: яко аз согреших, и весь грех есмь, яко мене ради смятеся брат мой. Сей же, яко не разсуди прежде, неже возглаголати слово оно, яко не к нему речено, и яко ничтоже противно не имел еси рещи до смерти, но и той, якоже ты, обретеся не имый терпения. Обаче вы не имате вещи, но мы есмы виновни злых, яко молитв не имамы. Аще бы быхом имели, покровени быти имели бысте от лукаваго, сеющаго посреде вас плевелы во еже искусити вас. О сем бо молимся, еже вам покровенным быти. Не боитеся ли суда Божия, да не соблазнятся о вас человецы, глаголюще: се чада отцев, како не имут терпения, но друг на друга находят? Аще убо вы стыдитеся друг другу положити метание от сердца, мы положим за вас: нам бо подобает таковый студ. Господь да простит вам, и да сохранит вас от лукаваго, и да сокрушит его под ноги ваша вскоре. Единодушии будите о Господе, и единомысленни, и единоверии. Господь да утвердит вас непоколебимых во страсе Своем. Аминь.

Вопрос 699. Ин христолюбец, странноприемлющ отцы, посла писанием, вопрошая тогожде старца: полезно ли ему отврещися совершенно мира и приити во иноческое житие? И егда отписа ему старец, яко совершеннейшо есть отшествие, возмнев, яко по заповеди ему слово речено бысть, оскорбе зело, и помысли ктому не вопрошати отцев ни о чемже. Сие разумев старец духом, рече написати ему сия:

Ответ. Прежде всех целуем о Господе любовь твою, и просим тя всякий помысл печален отложити, и со радостию и страхом Божиим прочести и выразумити преднаписанная тебе в первом послании. Ниже бо по заповеди написахом вам что, навыкше от апостола, глаголющаго: не да сило вам наложу, но разсуждающе в вас едино коеждо дело, кое имать пользы различие, якоже вси слышахом Спаса, во Евангелиях глаголюща писанная в законе: еже не прелюбы сотвориши, не убиеши, и прочая.

Вопросившему Его же рекшу: вся сия сохраних, что есмь еще не докончал? Глагола ему о совершенстве: аще хощеши совершен быти, продаждь имение твое, и прочая, яже веси. Но доброненавистник присно обходит, запиная всякому делу благу. Ведя бо написанную вам пользу, и прежде неже уразумети вам силу написанных, вмале не смути помысла вашего. И удивитися мощно, како покрывает ум человека, восхищая помысл его, якоже бы совершенно не спользоватися ему: и не оставляет его вопросити себе, чесого ради смущается, и рещи себе: «вскую прискорбна еси душе моя; и вскую смущаеши мя; уповай на Бога, яко исповемся Ему» (Пс. 41, 6) и прочая. Сия же творит, во еже показати человеку, яко аще бы от святых быша написанная, то помощь подавали быша, а не смущение и искушение. Но трезвенный во ум приводит и апостолов, неверствием смутившихся, егда увидеша Владыку своего и Спаса Христа; назнамена бо им, глаголя: «что смущени есте; и почто помышления входят в сердца ваша» (Лк. 24, 38)? И абие последова словесем Его тишина. Тако и мы, аще в безмолвии сердца прочтем написанная, и обрящем, яко не достизаем сотворити, по писанному, на сто, и на шестдесят: аще не тако, то поне третие, (сиречь) на тридесять. Да разумеем же, яко во всех полезна быша нам написанная, аще и не достизаем сотворити совершенное, наказуемся в предлежащем странноприимства деле, якоже не высокомудрствовати, яко велие нечто творим, обретающе, яко совершенства недостигохом сотворити. Не тако отметающе бываемая ныне от вас, написахом вам содержащаяся в первшем послании, но да в большее приидете, или пребывающе, в нихже есте, смиренным помыслом устрояете дело тое. Да не чудитеся же о искушениих: заповедь бо имамы, яко «радуйтеся, егда во искушения впадаете различна» (Иак. 1, 2). Вопрошен же бысть иногда некий от святых отец от некоего брата: что есть сие, авво, яко, егда хощу уснути, и труждаюся молитву дея, и знаменуя себе (крестным знамением), в тую нощь искушение блуда стражду во сне; аще же не сотворю молитв, ниже назнаменую, не бывает (ми) искушение? И отвеща ему старец, глаголя: яко по хитрости сие творят бесове, во еже отставити тя от молитвы и знамения крестнаго: ведят бо, яко от сих помощь бывает человеку тому. Тако и ты, аще что вопросиши отцев, и на время смутят тя бесове за словеса их, никогдаже да отступиши от вопрошения их; ничтоже бо вредно или тяжко установляют: ученицы бо суть Рекшаго: «иго Мое благо, и бремя Мое легко есть» (Мф. 11, 30). И послежде обрящем плод пользы их, и тогда возопием со Псалмопевцем, глаголющим: обратил еси плач мой в радость мне, и прочая.

Вопрос 700. Случается, мне беседующу с некиим, внезапу парити умом, якоже мнети и вне себе быти, и предлежащаго забывати слова, не преносящуся уму во ино нечто, но изступающу из себе самаго. Что убо есть сие, отче? И что мне подобает творити? Зело бо скорблю.

Ответ. Сие брань есть диавольска хотящи посрамити человека того пред сущими. Аще же со свободою явиши им вещь ону, глаголя: простите мне, парити сотвори мя диавол; посрамится и престанет брань сия; и прочее с трезвением беседуй. Непщуется же ничтоже быти сие. Не разумевающему же мног стыд творить. Память же имене Божия вся совершенно злая упразднит и укрепит немощь нашу. Аминь.

Вопрос 701. Муж некий, христолюбец, воздержлив сый зело, и о своей пекийся душе, посла, вопрошая тогожде старца: что есть полезно творити кому, то ли, еже тому мнится благо, или с вопросом отцев?

Ответ. Аще кто от себе помышляет некое добро творити, а не с вопросом отцев, сей несть законен, и законно ничтоже сотвори. Аще ли же кто с вопросом творит, сей исполняет закон и пророки. Смирения бо знамение есть, еже вопрошати: и Христа, Смирившаго Себе и до раба, подражатель таковый. Муж бо безсоветен, сам себе враг. Глаголет бо: «с советом вся твори» (Сир. 32, 21). И Иоанн Колов глаголет: «Аще видиши юна, своею волею восходяща на небо, удержи его за ногу, и верзи долу». Полезнее есть смиренно вопрошати, нежели своим хотением шествовати. Бог бо есть, влагаяй во уста вопрошаемаго, что да речет, за смирение сердца и правоту вопрошающаго.

Вопрос 702. Аще сежу со отцы, и стязаются о вере с некиим от неправомудрствующих: должен ли есмь и аз стязатися, или ни? Глаголет бо ми помысл: яко аще молчиши, предаеши веру. Аще ли же и тонкая беседа будет в них о догматех, возглаголю ли яже вем, или премолчу? Аще ли же и вопрошен буду, что сотворю?

Ответ. Никогда же да стязаешися о вере: не ищет бо от тебе Бог сего; но точию веровати право, и приял еси от Церкве Святыя на крещении и еже творити заповеди Его. Сия убо сохрани, и спасешися. Беседовати же о догматех не подобает: превосходят бо тебе сия. Но молися Богови о своих согрешениих, и в сих ум твой да упражняется. Блюди же, да не осудиши в сердце твоем беседующих сия: не веси бо аще право они беседуют, или ни, – и яко Бог судит дело то. Аще же вопрошен будеши, рцы, яко сия превосходят мя, и, простите мя отцы святии.

Вопрос 703. Аще же, стязаяся еретик свяжет словом своим православнаго: еда несть добро помощи мне ему, елико могу, да не побежден быв, вредится в православной вере?

Ответ. Аще влагаеши себе побеседовати, то и пред Богом беседуеши, и пред человеки, и обретается, аки учительство. Аще же кто учит, не имый силы, вероятно слово его не бывает, но безплодно. Егда же ничтоже пользуеши, то кая потреба и беседовати? Аще ли же всяко помощи хощеши, возглаголи в сердце твоем Богу, тайная Ведущему и Могущему сотворити паче, яже просим у Него, и Той, по воле Своей, сотворит со стязающимися. А ты смирение обрящеши в деле сем. Якоже бо аще ввержет кто в темницу кого не праведно по власти. Другий же, зря бываемое и не могущ противорещи, или снабдети человека того, отшед тайно, речет некоему сильнейшему, и той, послав своею властию, возмет его, ввергшему смущающуся, не знающу же, кто есть возвестивый. Тако и зде, да приступим ко Богу о вере, и о братиях наших, в молении сердца, и Той, иже клятся Собою, яко всем человеком хощет спастися и приити в познание жизни, сотворит и с ними по воли Своей.

Вопрос 704. Еда должен есмь искати поне разсуждаемая, да известно та увем и не стязаюся?

Ответ. Ничтоже ищи от тех, ихже Бог не взыскует от тебе, ниже да внесеши прибедственна словеса: но буди доволен, якоже рех, исповеданием правыя веры, и ничтоже сего множае любопытствуй.

Вопрос 705. Аще убо от Писаний будет беседа, премолчу ли, или возглаголю? Аще ли же и случится им сумневатися о нечесом, еже аз вем, еда добре есть, да реку, или ни?

Ответ. Молчание лучшо есть. Аще же сумнятся, и веси тое, за еже решену быти сумнению, рцы со смирением, еже вси. Аще же не веси, ничтоже да речеши, аки от своего помысла: безумие бо есть.

Вопрос 706. Аще о вещах будет беседа, не имущих вреда душевнаго, премолчу ли, или возглаголю?

Ответ. Прежде вопрошения несть добро возглаголати. Аще ли же и вопрошен будеши, рцы, еже веси, со смирением и страхом Божиим. Ниже возвышался, аще приято будет слово твое, – ниже скорбя, аще не приято будет: сей бо есть путь Божий. И да не вменишися быти молчалив, рцы от себе и нечто в разуме, и сократи, и избавишися многословия и суетнаго мнения.

Вопрос 707. Аще кто речет ми прокляти Нестория и подобныя ему еретики: проклену ли, или ни?

Ответ. Яко убо Несторий и иже по нем, еретицы под анафемою суть, яве есть: ты же не приходи на проклинание кого отнюд. Имеяй бо себе грешна, плакати должен есть грехов своих, и ничтоже ино. Но ниже судити подобает проклинающия кого. Кийждо же себе да искушает.

Вопрос 708. Аще же кто от сего непщует, яко и аз онаго мудрствую: что реку ему?

Ответ. Рцы ему: аще и яве есть, яко они достойни суть проклинания, но аз грешнейший есмь паче всякаго человека: и боюся, да не како, инаго осуждая, себе осуждаю. Ибо и самаго сатану аще прокляну, понеже творю дело его, то себе проклинаю. Господь бо рече: «аще любите Мя, заповеди Моя соблюдите» (Ин. 14, 15). И апостол глаголет: «аще кто не любит Господа, проклят да будет» (1 Кор. 16, 22). Убо, не творяй заповеди Его, не любит Его: и не любяй Его, под клятвою есть. И како таковый иных может проклинати? Сия рцы ему: и аще пребудет в техжде, совести его ради, прокляни (яко) еретика.

Вопрос 709. Аще ли же не вем, яко есть еретик, егоже глаголет ми проклясти: что сотворю?

Ответ. Рцы ему: брате, аз, како мудрствует, о немже глаголеши ми, не вем: проклята убо, егоже не вем, мнится мне во осуждение. Сие же глаголю тебе: яко кроме веры оныя святых трех сот осминадесяти отцев иныя не вем. И иже вне сея мудрствует, вверже сам себе во анафему.

Вопрос 710. Аще будет гонение, что сотворю? Пребуду ли или отыду?

Ответ. Вопроси духовных отцев, и, якоже глаголют та, сотвори. И да не последуеши своему разсуждению, да не в неразумии беду приимеши.

Вопрос 711. И аще не обретаю отцев в час нужды, к нимже имам извещение, да вопрошу их о сем, что сотворю? Пребуду ли, да не явлюся предал веру, или отыду, бояся побеждения?

Ответ. Стани на молитве, и помолися человеколюбцу Богу всем сердцем, глаголя: Владыко, помилуй мя благости ради Твоея, и да не попустиши мя заблудити от воли Твоея, ниже, да предаси мя предлежащему искушению в погибель. И сие сотвори до трех крат, якоже и Спас в час предания. И по сих аще видиши себе имуща усердие несумненно пребыти, и вся претерпети Божиею благодатию находящая лютая, даже и до самыя смерти, тогда пребуди. Аще ли же видиши боязнь в сердце твоем, отыди. И да не вознепщуеши в сем предавати веру: не истязует бо Бог, яже суть выше силы. Аще бо имея страх пребудеши: случается, не могущу стерпети наводимых скорбей и мук, предателю истины быти, и себе восприяти вечную муку.

Вопрос 712. Аще ли же нехотя впаду во искушение сие, что сотворю?

Ответ. Возверзи все свое попечение на человеколюбиваго Бога, глаголя: Владыко, благости ради Твоея, и молитв ради всех святых Твоих, не яко могий, поставих себе в сие, но не хотя сретох. Не остави убо мене предати святую веру.

Вопрос 713. Како должен есмь молити отцы о прощении грехов моих? Яко простите мя, или яко, испросите ми прощение? Егда же самаго Владыку молю, како должен есмь глаголати?

Ответ. Егда убо отшедших ко Богу молим, подобает глаголати: простите ми. Егда же еще с нами сущих: помолитеся о нас, да приимем прощение. Егда же Самаго Владыку молим, да глаголеши: помилуй мя, Владыко, святых ради Твоих мученик и ради святых отец: и прости ми, молитвами их, согрешения моя. Ибо и пророк глаголаше: «Авраама ради раба Твоего» (Дан. 3, 35). И Сам Господь: «защищу град сей Мене ради, и Давида ради раба Моего» (4 Цар. 19, 34).

Вопрос 714. Аще сежу с мирскими человеки, и приидет празднословие, пребуду ли или отыду?

Ответ. Аще не имаши нужды, отыди; аще ли же будет нужда, преложи ум твой на молитву твою, не осуждая онех, но свою немощь познавая.

Вопрос 715. Аще ли же любовни мне будут, повелеваеши ли, да преложу таковую беседу на ину потребнейшу?

Ответ. Аще веси, яко приемлют сладце слово Божие, рцы от жития святых отец, и преложи беседу на спасение души.

Вопрос 716. Добро ли есть, внегда беседовати с кем, призывати имя Божие?

Ответ. И внегда беседовати, и прежде беседы, и по беседе, и на всяко время, и на всяком месте, подобает призывати имя Божие: писано бо есть: «непрестанно молитеся» (1 Сол. 5, 17), тако бо упраздняется всяко искушение.

Вопрос 717. И како может кто непрестанно молитися?

Ответ. Егда кто о себе есть, должен пети, и усты и сердцем молитися. Аще ли же кто на торжищи будет с некиими, не подобает усты пети, но единым умом. Подобает же очи блюсти, парения ради помыслов и сетей вражиих.

Вопрос 718. Егда молюся, или пою, и не ощущаю силы глаголемых, жестокости ради сердца моего: то что пользуюся?

Ответ. Аще ты и не ощущаеши, но бесове ощущают, и слышат, и трепещут. Да не престанеши убо поя и моляся, и по малу с Богом умягчится жес токость она.

Вопрос 719. Аще буду близ церкве, и глаголется трисвятое, и сежу со отцы, или миряны: востану ли, и реку, онем седящым, или ни?

Ответ. Аще будут отцы, еже аще творят они, и ты сотвори. Аще ли же миряне большии тебе будут, и веси, яко соблазнитися имут, то добро есть сохранити совесть их, и сотворити, якоже творят. Можеши же и внегда седети тебе с ними, рещи тое в сердце твоем. Аще ли же что тебе препятствует, довлеет сия память довольное сотворити. Аще же не суть большии тебе востани, и рцы: и аще захотиши их востати, не неприлично есть: а они, яко хотят, сотворят.

Вопрос 720. Аще есмь на едине, и суть ми некая в руку моею, препятствующая ми востати: что сотворю?

Ответ. Аще не можеши, да не оскорбляет тя тое, еже не востати: вся бо помыслом бывают и разсуждением.

Вопрос 721. Аще отхожду ко отцем, и любопрятся удержати мя, и имам нужную потребу, что сотворю?

Ответ. Аще убо суть довольни по Богу разсудити вещи, глаголи им со смирением: простите мне, яко потреба мне нужная належит. И якоже услышиши от них, сотвори без труда, веруя, яко всяко на пользу есть. Аще ли же не суть таковии, и будет потреба твоя нуждная, пресецы любопрение, и сотвори метание, якоже отыти. Аще же и по метании пребудут в любопрении, то рцы им: простите мя, не возможно бо есть да остану

Вопрос 722. Аще обедаю с некиими от отец, и благословит кто от них предлежащую пищу, еда должен есмь, хотя вкушати, глаголати ему: благослови, и пождати, донележе паки благословит мне или доволен быти первым благословением? Понеже случается, яко инуде имать ум свой и коснит отвещати, и присно скорблю. Еда же ли добро есть, да, егда положу руку на пищу, запечатлею ю, рекше назнаменую крестным знамением.

Ответ. Единою благословил есть; излишне убо есть сие. И ради еже запечатлети, ниже сего потреба есть. Благословение бо печать есть. И паки да не даси помысла благословившему, или иному кому, аки не веруяй благословению того, и будет то в соблазн.

Вопрос 723. Аще понуждают мя отцы к нимже прихожду, благословити предлежащую пищу, послушаю ли их, или ни?

Ответ. Да не послушаеши, глаголя: ниже причетник есмь, ниже образ иноческий ношу, но человек есмь мирянин, и грешен, и превосходит меру мою сие; но простите мя Господа ради.

Вопрос 724. Аще миряне будем вси сущии на трапезе, что сотворим не имуще благословящаго?

Ответ. Добро есть и миряном приемлющим пищу благословити Бога: памятию бо Божиею пища освящается. Сие же благословение несть, якоже благословение причетническое: но славословие есть, и память Божия. Всем бо лепо есть поминати Бога и славословити Его. Добро убо есть и мирским сие творити, аще не имут могущаго благословити.